Կյանքից հեռացել է հանրահայտ երգիչ Նիկոլայ Արությունովը

Վաթսուներեք տարեկանում մահացել է երգիչ Նիկոլայ Արությունովը: «Արմենպրես»-ի հաղորդմամբ՝  այս մասին գրել է «ՌԻԱ Նովոստին»:

Նիկոլայ Արությունովը (Տեր-Հարությունյան) ծնվել է Մոսկվայում: Հայոց ցեղասպանությունից հետո Տեր-Հարությունյանների ամբողջ գերդաստանից կենդանի է մնացել միայն Նիկոլայի պապը՝ Նժդեհը, որը բնակություն է հաստատել Մոսկվայում:

Նիկոլայ Արությունովը հայտնի երգիչ, երգահան է, որը պատկանում է աշխարհի հանճարեղ հայերի թվին՝ ըստ «Զարմանահրաշ ազգ հրաշքների աշխարհից» գրքի: Իր երաժշտական կարիերան Նիկոլայը սկսել է Ստաս Նամինի (Միկոյան)՝ «Ցվետի» (Цветы) խմբի հետ: 1979 թվականին կյանքի է կոչել իր ամենահայտնի նախագիծը՝ «Բլյուզի լիգան» (Лига блюза) խումբը: Հանդես է  եկել երաժշտական տարբեր ժանրերում. բլյուզ, ռոք-բլուզ, սոուլ, ֆանկ, հարդ-ռոք:

Նիկոլայ Արությունովը ստեղծել է Лига Блюза, Четверг Арутюнова, Николай Арутюнов & The Blues Barbarians, Арутюнов & Quorum, The Booze Band, Funky Soul խմբերը՝լինելով նաև դրանց մենակատարը: