Հաջորդ անգամ փշալար քաշեք. Փաշինյանն անարգեց «Եռաբլուրը»

Հայաստանի բարձրաստիճան պաշտոնյաները՝ վարչապետի պաշտոնը զբաղեցնող Նիկոլ Փաշինյանի գլխավորությամբ երեկ առավոտյան ուղևորվել էին «Եռաբլուր»՝ հարգանքի տուրք մատուցելու արցախյան 44- օրյա պատերազմի զոհերի հիշատակին։ Թերևս առաջին անգամն էր, որ ոստիկանությունը մեծ ուժեր էր կենտրոնացրել «Եռաբլուրի» մուտքի մոտ ու թույլ չէր տալիս ոչ միայն լրագրողների մուտքը, այլ նաև զոհված զինծառայողների ծնողների, ակտիվիստների, քաղաքական գործիչների մուտքը։ Իսկ մարդիկ եկել էին մեկ նպատակով. Նիկոլ Փաշինյանին բացատրելու, որ իրավունք չունի գալ «Եռաբլուր» և նայել զոհերի հարազատների աչքերի մեջ։ Լրագրողների համար առանձին տեղ էին առանձնացրել բավական հեռու, որպեսզի նրանք չկարողանան մոտենալ պետական բարձրաստիճան պաշտոնյաներին և տհաճ հարցեր տալ։ Իսկ զոհվածների ծնողներին ընդհանրապես հեռու էին պահում, իրավապահներ էլ ուժ էին կիրառում՝ չթողնելով նրանց մոտենալ Նիկոլ Փաշինյանին։ Ոստիկանությունը նույնիսկ ուժ գործադրեց և, քաշքշելով, թևերն ոլորելով, դաժանորեն ծեծելով, բերման ենթարկեց «Երկիր ծիրանի» կուսակցության նախագահ Զարուհի Փոստանջյանին։

Այս իշխանությունը 2018թ. իշխանության գալով, հայտարարում էր, որ ջնջելու է բոլոր սահմանները, բոլոր արգելապատնեշները ժողովրդի և իշխանության միջև։ Ժողովրդին էր հռչակում որպես իշխանության գերագույն կրող, իսկ իրենց՝ նրա ծառաները։ Փաստորեն ժողովրդի ծառաներն այսօր նույն այդ ժողովրդից առանձնանում են Նիկոլ Փաշինյանի ծառաներով՝ ոստիկաններով։ Այս անգամ ոստիկանական արգելապատնեշ ու ժապավեններ էին քաշել իշխանության ու ժողովրդի միջև։ Հեռու չէ այն օրը, երբ արդեն փշալարեր կքաշեն, իրական պատեր կկառուցեն, զենքեր և տանկեր կբերեն, որպեսզի կարողանան իրարից զատել ժողովրդին և ժողովրդի ծառաներին։ Այս առումով առավել տարակուսելին հենց իշխանության մեջ հայտնված որոշ նախկին ակտիվիստների վարքն է, մարդիկ ովքեր տարիներ շարունակ իբր պայքարել են նախկինների ապօրինությունների դեմ, այսօր տասնապատկում և հարյուրապատկում են բոլոր այդ արատավոր բարքերը, իրենք են անջրպետվում Հայաստանի Հանրապետության շարքային քաղաքացիներից, իրենք են կրկնում նախորդների սխալները, նախորդների բոլոր վատթարագույն քայլերը, ավելացնում, բազմապատկում։ Եվ հետագայում նույնիսկ զարմանալու են, թե ինչու ժողովրդի և իրենց միջև անջրպետը հասցրեց նոր հեղափոխության, որի ծիլերը դրվում են այսօր Նիկոլ Փաշինյանի լպիրշ իշխանության շնորհիվ։

Տարոն Ոսկանյան