Ադրբեջանի օգտին լրտեսության մեջ մեղադրվող աղջիկը չի հասկացել «շպիոն» բառի իմաստը

News.am-ը գրում է.

Ադրբեջանի օգտին լրտեսության մեջ մեղադրվող 19-ամյա Դիանա Գորոյանը չի ընդունում իրեն առաջադված մեղադրանքը, քանի որ չի հասկացել «շպիոն» բառի իմաստը: Այս մասին ասվում է Դիանա Գորոյանի նախաքննական ցուցմունքի մեջ, որն այսօր՝ հունիսի 3-ին, ընթերցվեց Կենտրոն եւ Նորք Մարաշ համայնքների ընդհանուր իրավասության դատարանում:

«Մեղավոր չեմ ճանաչում ինձ, քանի որ չեմ հասկացել շպիոն բառի իմաստը եւ լուրջ չեմ վերաբերվել այդ ամենին»,- սա Դիանա Գորոյանի ցուցմունքի ամբողջ բովանդակությունն է:

Նա դատարանում նույնպես հրաժարվեց պատասխանել հարցերի:

Դիանա Գորոյանին մեղադրանք է առաջադրվել այն բանի համար, որ նա իր հորաքրոջ աղջիկը հանդիսացող Կարինե Ղումաշյանից տեղեկացել է, որ Թուրքիայում գտնվելու ժամանակ, ծանոթացել է Արման անունով ներկայացած մի անձի հետ, որը գումար և նվերներ է տրամադրել նրան, հեռախոսային խոսակցության ընթացքում Կարինե Ղումաշյանից իմացել է, որ Արման անունով ներկայացած այդ անձնավորությունը հանդիսանում է արտասահմանյան հետախուզական ծառայության աշխատակից: Գիտակցելով, որ խոսքը գնում է վերոհիշյալ Արմանի կողմից Կարինե Ղումաշյանին հավաքագրելու, ինչպես նաև Կ. Ղումաշյանի որդուն` Տիգրան Կարապետյանին հավաքագրելու նախապատրաստության, այն է նախապատրաստվող պետական դավաճանության մասին, Դիանա Գորոյանը այդ մասին չի հայտնել իրավապահ մարմիններին:

Այս գործով որպես մեղադրյալներ ներգրավված են նաեւ Ռաֆիկ Պապոյանը, Կարինե Ղումաշյանը, Սերգեյ Պապոյանը: