Դիրքում մահացած զինծառայողի գործով ձերբակալվել է նրա ծառայակիցը՝ կրտսեր սերժանտ
ՀԱՍԱՐԱԿՈՒԹՅՈՒՆ
Ժամկետային զինծառայող, կրտսեր սերժանտ Խորեն Հարությունյանի մահվան դեպքի առթիվ երրորդ կայազորային քննչական բաժնի վարույթում քննվող քրեական գործով ձերբակալվել է նույն զորամասի ժամկետային զինծառայող։ Այս ամսին տեղեկանում է ՀՀ Քննչական կոմիտեի մամլո ծառայությունը:
Ձեռնարկված քննչական գոծողությունների արդյունքում պարզվել է, որ Խ.Հարությունյանը մահացու հրազենային վնասվածքն ստացել է մարտական դիրքում կրտսեր սերժանտ Ա.Խաչատրյանի կողմից զենքի հետ վարվելու կանոնները խախտելու հետևանքով արձակված կրակոցից։
Կրտսեր սերժանտը ձերբակալվել է՝ ՀՀ քրեական օրենսգրքի 373-րդ հոդվածի 3-րդ մասով նախատեսված արարք կատարելու կասկածանքով (զենքի հետ վարվելու կանոնները խախտելը, որն անզգուշությամբ առաջացրել է մարդու մահ)։
Նախաքննությունը շարունակվում է։
Նշենք, որ Խորեն Հարությունյանը Գեղարքունիքի մարզի Արծվանիստ գյուղից էր:
Խորենը միայնակ մոր զավակ է, հայրը տարիներ առաջ է մահացել: Նա տան կրտսերն էր, երկվորյակ քույր ուներ ու մեկ եղբայր, մայրը ուսուցչուհի է, աշխատում է գյուղի դպրոցում:
Նշենք, որ ըստ ՔԿ հաղորդագրության՝ Խորեն Հարությունյանը մահացել է կրծքավանդակի շրջանում մահացու հրազենային վնասվածքից:
