Սահմանազատում և սահմանագծում՝ ընդդեմ Հայաստանի շահերի

Սյունիքի մարզում Գորիս-Կապան միջպետական ճանապարհի Գորիս-Որոտան և Շուռնուխ-Կարմրաքար հատվածների փակումը հերթական փորձությունը դարձավ Հայաստանի գործող իշխանության համար, և հերթական անգամ Նիկոլ Փաշինյանի իշխանությունը ձախողեց այդ փորձությունը։ 

Հանրության բուռն զարմանքոն ու զայրույթն էր հարուցել կառավարության նիստում Նիկոլ Փաշինյանի հայտարարությունը, երբ հայկական տեղանունների փոխարեն նա նախընտրեց օգտագործել ադրբեջանական Էյվազլի և Չայզամի տեղանունները։ 

Փաշինյանի քարոզիչները դրանից հետո աղմուկ բարձրացրին, իբր Փաշինյանը հայկական գյուղերը նկատի չի ունեցել, այլ Ադրբեջանի տարածքում գտնվող տարածքները, սակայն սա ընդամենը տակտիկական հնարք էր՝ ձախողումն արդարացնելու։ Ինքը՝ Փաշինյանն էլ պնդում է, թե Ադրբեջանն այս քայլն արել է հայկական իշխանությունների առաջ քաշած խաղաղության օրակարգին հարվածելու, այդ օրակարգը վարկաբեկելու համար: «Ադրբեջանի պահվածքը վկայում է, որ նման միջադեպեր էլի կարող են լինել: Մեր ծառայությունները, իհարկե, պետք է զգոն լինեն և ուշադիր, բայց, մյուս կողմից, մեզ ամուր նյարդեր են պետք, և մենք մեր ռազմավարական գիծը՝ խաղաղության օրակարգը, պիտի զարգացնենք, առաջ տանենք: Սյունիքի ճանապարհների հետ կապված իրադրության ստեղծումը մեզ համար անկանխատեսելի չէր, և մենք այս ընթացքում աշխատել ենք նոր ենթակառուցվածքների ձևավորման ուղղությամբ ու շարունակելու ենք աշխատել: Սակայն Էյվազլի և Չայզամի հատվածներում ճանապարհի վերաբացումը տարածաշրջանային կայունության շատ լավ խորհրդանիշ կարող է դառնալ»,- նշել է Փաշինյանը: Ճանապարհն այսօր արդեն բացվել , սակայն որևէ երաշխիք չկա, որ այն կրկին չի փակվի։ Թերևս, ամենաճիշտը ձևակերպել է քաղաքագետ Ստեփան Դանիելյանը։ 

«Ադրբեջանը պահանջել է, որ Հայաստանը պաշտոնապես հայտարարի, որ Գորիս-Կապան ճանապարհի 21 կիլոմետրը ճանաչում է որպես Ադրբեջանի տարածք, այդ թվում նաև երկու գյուղերը։ Պահանջը կատարվել է, ՀՀ վարչապետը հայտարարեց, որ 21 կիլոմետրը Ադրբեջանի տարածքն է (այն էլ կառավարության նիստի ժամանակ), նաև որպես Ադրբեջանի տարածք ճանաչեց նաև երկու գյուղերը, օգտագործելով դրանց ադրբեջանական անվանումները։ Որպեսզի տարընթերցումների չլինեն, ՀՀ վարչապետի խոսքերը հստակեցրեցին ՀՀ մի քանի նախարար ու պատգամավոր։ Քչերը հասկացան, որ տեղի ունեցավ հայ-ադրբեջանական սահմանի այդ հատվածի սահմանազատման ու սահմանագծման գործողությունը»,- նշել էր Դանիելյանը։

Իսկ մենք արձանագրենք, որ Նիկոլ Փաշինյանի իշխանությունը գլխիկոր համաձայնվում է Ադրբեջանի բոլոր պահանջների հետ, կետ առ կետ իրականացնում այդ պահանջները, ժամանակ շահում՝ Հայաստանում իշխանության ղեկին ամրապնդվելու, ընդդիմախոսներին ճնշելու և իր քարոզչական թեզերով բողոքի ալիքը լռեցնելու համար:

Արամ Գիշյան