Կորոնավիրուսով վարակվածներից ծանր և ծայրահեղ վիճակում գտնվում է մոտ 700 բուժառու․ Անահիտ Ավանեսյան

Երեկ արձանագրվել է կորոնավիրուսի 522 դրական դեպք, իրականացվել է 6383 թեստավորում, գրանցվել է 11 մահ։ Այս մասին կառավարության հերթական նիստին ասաց առողջապահության նախարար Անահիտ Ավանեսյանը։

«Ունենք 14 բժշկական կենտրոն, որ սպասարկում են «քովիդ» պացիենտների, ծավալել ենք 1500 մահճակալ, որից 1143–ը զբաղված են»,–ասաց նա և նշեց, որ ծանր և ծայրահեղ վիճակում գտնվում  է մոտ 700 պացիենտ, ինչը մտահոգիչ է։;

«Այս պահին ակտիվ կերպով շրջանառվում է դելտա շտամը, որը բարձր վարակելիության աստիճան ունի և հիվանդացության ավելի ծանր ընթացք։ Մենք ունենք երիտասարդ պացիենտներ, որոնք որևէ ուղեկցվող հիվանդություն չունենալու պարագայում ներկայումս ծայրահեղ ծանր վիճակում են գտնվում, և մեր բժիշկները պայքարում են նրանց կյանքի համար»,–ասաց նա։

Անահիտ Ավանեսյանը նշեց, որ երեկ իրականացրել են 7114 պատվաստում, ընդհանուր առմամբ, 267 504 պատվաստում են իրականացրել և բավական ակտիվություն ունեն, որոշ պոլիկլինիկաներում հերթեր են գոյանում։

Նա նկատեց, որ դիմակների կրման ռեժիմի ավելի ակնհայտ կիրառում ունեն։ «Մենք պատրաստ ենք ծավալել մինչև 2700 մահճակալ, սա մեծ լարվածություն է առաջացնում, ընդհանուր առմամբ, առողջապահական համակարգում, քանի որ աշնան սեզոնը հիվանդությունների աճով է աչքի ընկնում»,–ասաց նա։

Առողջապահության նախարարը նշեց, որ միայն «Սպուտնիկ V»–ի մատակարարման որոշակի հապաղումներ կան, բայց հույս հայտնեց, որ մյուս շաբաթ երկրորդ դեղաչափը կստանան։ Նիկոլ Փաշինյանը կոչ արեց վերահսկողությունը պահպանել։

Լիանա Առաքելյան