Լավրովը միջազգային փոխադրողներին առաջարկել է դիտարկել ԼՂ–ում աշխատելու հնարավորությունը

Ռուսաստանի արտգործնախարար Սերգեյ Լավրովը Միջազգային ավտոմոբիլային փոխադրողների ասոցիացիային առաջարկել է դիտարկել Լեռնային Ղարաբաղում աշխատելու հնարավորությունը։ Տեղեկությունը հայտնում է ՌԻԱ Նովոստին։

«Այնտեղ այժմ ակտիվ աշխատանք է տարվում ենթակառուցվածքների, ավտոճանապարհների վերականգնման ուղղությամբ։ Ուստի խնդրում եմ ուշադրություն դարձնել այս հեռանկարային տարածքին։ Այն, ըստ իս, ակնհայտ տնտեսական օգուտ կունենա, բայց նաև կարևոր է, որ այդ հատվածում տնտեսական զարգացումը տեղի ունենա ռուսական ակտիվ մասնակցությամբ», - ասել է Լավրովը Միջազգային ավտոմոբիլային փոխադրողների ասոցիացիայի հետ հանդիպմանը:

Հիշեցնենք, որ 2021 թվականի հունվարի 11-ին Մոսկվայում կայացավ Հայաստանի վարչապետ Նիկոլ Փաշինյանի, Ռուսաստանի նախագահ Վլադիմիր Պուտինի, Ադրբեջանի նախագահ Իլհամ Ալիևի հանդիպումը։

Գրեթե 4 ժամ տևած բանակցությունների արդյունքում ընդունվեց եռակողմ հայտարարություն, որը հիմնականում վերաբերում էր 2020-ի նոյեմբերի 9-ի հայտարարության 9-րդ՝ տարածաշրջանում բոլոր տնտեսական և տրանսպորտային կապերն ապաշրջափակելու վերաբերյալ կետի իրագործմանը։

Եռակողմ նոր հայտարարության մեջ նշվում է, որ 3 երկրների փոխվարչապետների համանախագահությամբ ստեղծվում է աշխատանքային խումբ։

Հանդիպման արդյունքների հիման վրա կկազմվի 9-րդ կետի կիրառումից բխող աշխատանքների հիմնական ուղղությունների ցանկը՝ որպես գերակայություններ ընդունելով երկաթուղային և ճանապարհային հաղորդակցությունները, ինչպես նաև կսահմանի Հայաստանի, Ադրբեջանի ու Ռուսաստանի միջև համաձայնեցված այլ ուղղություններ: