Ազգային ժողովի անպտուղ բանավեճերը անհամարժեք են առկա մարտահրավերներին

Հայաստանի Ազգային ժողովն այս ամբողջ շաբաթն էլ նվիրելու է անպտուղ բանավեճերին և գզվռտոցներին՝ հաշվի չառնելով երկրի առջև ծառացած լրջագույն մարտահրավերները։ Անցած ամբողջ շաբաթվա ընթացքում խորհրդարանին հաջողվեց ընտրել միայն ԱԺ նախագահ և երեք փոխնախագահներ։ Այս շաբաթն էլ կնվիրեն հանձնաժողովների նախագահների ընտրությանը։ Երեկ կայացած նիստում քննարկել են ընդամենը երկու՝ պետաիրավական և պաշտպանության ու անվտանգության հարցերի հանձնաժողովների նախագահների թեկնածությունները։ Իսկ հանձնաժողովների ընդհանուր թիվը, հիշեցնենք, 12-ն է։

Ընդդիմությունն ու իշխանությունը «միահամուռ» կերպով իրար անցյալ են հիշեցնում, տասնամյակների մամուլի հրապարակումներ մեջբերում, թեկնածուների՝ նախկինում արած ու ասածն են քննարկում, իրար հասցեին ցեխարձակումներ անում։ Եվ այս գզվռտոցում կորում է ամենակարևորը՝ պետականության զգացումը։ Իսկ ամենալուրջ հարվածը ստանում է Հայաստանի ամենակարևոր պետական հաստատությունը՝ բանակը։

«Քաղաքացիական պայմանագրի» անդամներն ընդդիմությանը մեղադրում են իրենց ծառայության ժամանակ սոված մնալու մեջ, ընդդիմությունն էլ՝ Նիկոլ Փաշինյանին մեղադրում է պատերազմում պարտության մեջ։ Անդրանիկ Քոչարյանի թեկնածության քննարկումը երեկ և այսօր վերաճեց բանակային սննդի որակի քննարկման։ Ի վերջո, այսօր ընթացող նիստում Գեղամ Նազարյանը հորդորեց դադարեցնել այդ հարցի քննարկումը, նշեց, որ դա հարիր չէ Հայաստանի խորհրդարանին։ Նա արդարացիորեն նկատեց, թե բանակն այն հարցն է, որի շուրջ քննարկումները պետք է ընթանան դռնփակ, քննիչ հանձնաժողովի նիստում, այլ ոչ հրապարակային և նման տոնայնությամբ։ Ցավալիորեն, խորհրդարանի այս նիստերում որևէ բառ չի ասվել Հայաստանին ու Արցախին սպառնացող նոր մարտահրավերների մասին, պաշտոնների բաժանումն ավելի է կարևորվում, քան երկրի վիճակը։

Վրույր Պետրոսյան