Նիկոլ Փաշինյանի նոր դավադրությունը․ Արևմուտքին ներքաշել իր ստոր ծրագրի մեջ

Ֆրանսիայի նախագահ Էմանուել Մակրոնը նախօրեին հեռախոսազրույց է ունեցել վարչապետ Նիկոլ Փաշինյանի հետ, շնորհավորել վերընտրվելու կապակցությամբ, խոստացել կորոնավիրուսի դեմ պատվաստանյութի 200 հազար դեղաքանակ ուղարկել Հայաստան։ Ելիսեյան պալատի և պաշտոնական Երևանի տարածած հաղորդագրությունները, սակայն, միայն այսքանով են համընկնում։ ՀՀ կառավարության հաղորդագրությունը ուշագրավ մի դրույթ է պարունակում, իբր «նախագահ Մակրոնը հույժ կարևորել է Հայաստանի և Ադրբեջանի միջև սահմանագծումն ու սահմանազատումը: Համաձայնելով այս մտքին՝ ՀՀ վարչապետն ընդգծել է, որ հայ-ադրբեջանական սահմանազատում ու Լեռնային Ղարաբաղի հակամարտության կարգավորումը որևէ կերպ խաչաձևվող գործընթացներ չեն»: Մինչդեռ Ֆրանսիայի նախագահի աշխատակազմի տարածած հաղորդագրության մեջ սահմանագծման և սահմանազատման «հույժ» կարևորման մասին տառ անգամ գոյություն չունի, փոխարենը Ֆրանսիայի նախագահը վերահաստատել է իր աջակցությունը Հայաստանի տարածքային ամբողջականությանը։

«Պարոն Մակրոնը և պարոն Փաշինյանը անդրադարձել են Հայաստանի և Ադրբեջանի սահմանին աճող լարվածությանը: Հանրապետության նախագահը վերահաստատել է իր աջակցությունը Հայաստանի տարածքային ամբողջականությանը և հիշեցրել տարածաշրջանում կայունության վերահաստատման համար բանակցությունների վերսկսման անհրաժեշտությունը: Ֆրանսիայի Հանրապետության նախագահը և Հայաստանի վարչապետը պայմանավորվել են շարունակել համագործակցությունը Մինսկի խմբի շրջանակում»,- նշել են Ելիսեյան պալատից:

Ըստ էության, Ֆրանսիայի նախագահականի հաղորդագրությունը շատ ավելի հայամետ է, քան Նիկոլ Փաշինյանի աշխատակազմինը։ Հայաստանի գործող իշխանությունը շարունակում է տարածել ադրբեջանական թեզերը, և դրանք հայ հանրության մեջ ամրագրելու համար չի խորշում կեղծել բարեկամ երկրի նախագահի հետ ունեցած հեռախոսազրույցը, ներկայացնել՝ իբր Ֆրանսիան է շահագրգիռ սահմանագծմամբ և սահմանազատմամբ։ Փաշինյանը, կառավարության ձևավորումից հետո, ստիպված է անցնել Պուտինի ասած «բարդ, սուր և զգայուն հարցերի» լուծմանը, ինչ-ինչ ոչ հայանպաստ խոստումներ է տվել Ադրբեջանի նախագահին, և այժմ փորձում է մեղքը բարդել միջազգային հանրության վրա, իբր Արևմուտքն ու Ռուսաստանն են Հայաստանին մղում նման լուծումների։

Ֆելիքս Նիկողոսյան