Instagram-ն ու Facebook-ը մտածում են բլոգերներին բոնուսներ վճարել

Facebook սոցիալական ցանցի եւ Instagram ֆոտոծառայության ղեկավարությունը դիտարկում է գովազդից եկամտի մի մասը բլոգերներին փոխանցելու հարցը: Այդ մասին Bloomberg TV-ով պատմել է Facebook-ի գլոբալ մարկետինգային որոշումների փոխնախագահ Քերոլայն Էվերսոնը, հայտնում է Gazeta-ն:

Նախաձեռնությունը վերաբերում է մեդիա եւ հայտնի անձանց, որոնք իրենց հետաքրքիր բովանդակությունները ներկայացնում են առցանց հարթակներում: Մասնավորապես, Էվերսոնը նշել է, որ բոնուսները կարող են փոխանցվել ժողովրդականություն վայելող գրառումների համար` մարզական աշխարհի եւ աստղերի կյանքի իրադարձությունների մասին եւ այլ լուրերով:

Կորպորացիայի ներկայացուցիչը նշել է բացառիկ բովանդակության մեծ նշանակությունը Facebook-ի համար: Էվերսոնի խոսքով, IT-հսկան ուզում է տեղեկատվության տարածման գլոբալ հարթակ դառնալ եւ բլոգերների աշխատանքը վարձատրելու միջոցներ է փնտրում:

Այդ ուղղությամբ առաջին քայլը դարձել է Instagram-ի բիզնես-օգտատերերի համար նոր գործիքների թողարկումը: Մայիսի 31-ին ընկերությունը հայտնել է, որ հեղինակները հնարավորություն կունենան արձագանքի բարձր մակարդակով գրառումները գովազդի վերածել: