Ընդդիմադիր խմբակցությունները պայմանավորվել են․ միահամուռ կպայքարեն իշխանության դեմ

7-րդ գումարման Ազգային ժողովն արդեն պատմություն է, վատ ու մղձավանջային պատմություն։ Իսկ երկուշաբթի օրն իր աշխատանքները կսկսի 8-րդ գումարման Ազգային ժողովը, որտեղ ներկայացված արմատական ընդդիմադիր ուժերը մարտական են տրամադրված՝ Փաշինյանի ու նրա տխրահռչակ խմբակցության կյանքը դժոխքի վերածելու հարցում։ Իշխող ուժը ընտրություններից հետո փորձեց պառակտել ընդդիմադիր խմբակցություններին՝ մամուլում տեղեկություններ նետելով, թե ԱԺ փոխնախագահի կամ հանձնաժողովի նախագահների պաշտոններում կարող են ընտրել այս կամ այն պատգամավորին։ Փորձեց նաև լեզու գտնել մի դաշինքի հետ՝ ընդդեմ մյուսի, սակայն ապարդյուն։

«Ընդդիմադիր դաշինքները՝ «Հայաստանն» ու «Պատիվ ունեմ»-ը, ԱԺ իրենց հասանելիք պաշտոնների հարցում համաձայնության են եկել և ընդդիմության ԱԺ փոխնախագահի պաշտոնում կառաջադրվի ՀՅԴ-ական Իշխան Սաղաթելյանը։ Ընդդիմությանը նաև հանձնաժողովի երկու նախագահի պաշտոն է բաժին հասնում, թեև ընդդիմադիր խմբակցությունները պայմանավորվել են, որ պահանջ են դնելու Արցախի հարցով մշտական հանձնաժողով ստեղծելու շուրջ։ Այդ դեպքում երկու հանձնաժողով բաժին կհասնի «Հայաստան» դաշինքին, իսկ Արցախի հարցով հանձնաժողովը՝ «Պատիվ ունեմ» դաշինքին։

Մեր աղբյուրի փոխանցմամբ՝ ընդդիմադիր դաշինքների ներկայացուցիչները բուռն և արդյունավետ քննարկում են ունեցել, համաձայնեցրել են ընդհանուր մոտեցումները, աշխատանքի կարգը, իշխանական սադրանքներին միահամուռ պատասխանելու հնարավորությունը։ Այս մասին հիանալի գիտեն նաև իշխող «Քաղաքացիական պայմանագիր» խմբակցությունում, որտեղ արդեն խուճապի են մատնվել իրենց սպասվող փորձությունից։

Միհրան Կարապետյան