Փաշինյանի իշխանությունը պատերազմի մեղավորներ է փնտրում․ քննիչ հանձնաժողովի իրական նպատակը

Ռուսական հայտնի ասացվածք կա, որը վերագրում են ԽՍՀՄ գլխավոր դատախազ Վիշինսկուն․ «Քննչական գործողությունների ընթացքում գլխավորը դուրս չգալ ինքդ քո վրա»։

Հայաստանի գործող իշխանությունը հայտարարեց 44-օրյա պատերազմի իրադարձությունների վերաբերյալ քննիչ հանձնաժողով ստեղծելու մասին։

«Որոշում է կայացվել, որ քննիչ հանձնաժողով է ստեղծվելու 44-օրյա պատերազմի վերաբերյալ, և կարծում ենք, որ այդ հարցում նաև արտախորհրդարանական ընդդիմության մասնակցությունը պետք է լինի․ հանձնաժողովի գործունեությունը չպետք է սահմանափակվի Ազգային ժողովում այսօր ներկայացված կուսակցություններով»,- երեկ Նիկոլ Փաշինյան-«Քաղաքացիական պայմանագրի» պատգամավորներ հանդիպումից հետո ասել է Ալեն Սիմոնյանը։

ԱԺ նախագահի հիմնական հավակնորդը ընդգծել է, թե փորձել են հասկանալ, թե ինչ օրենսդրական լուծումներ պետք է առաջարկեն, որպեսզի արտախորհրդարանական ուժերի ներկայացուցիչները ներառվեն հանձնաժողովում։ Անհեթեթ այս հայտարարությունից հետո ԱԺ ընդդիմադիր խմբակցությունների ներկայացուցիչները ստիպված եղան Ալեն Սիմոնյանի համար հատուկ «լիկբեզ» անցկացնել, որ քննիչ հանձնաժողով ձևավորելու կարգը սահմանված է օրենքով, այլ ոչ իշխող ուժի քմահաճույքով։ Իսկ քննիչ հանձնաժողովում Փաշինյանի կցորդ արտախորհրդարանական ուժերի ներգրավումը մի էական նպատակ է հետապնդում՝ ամեն գնով խոչընդոտել 44-օրյա պատերազմի օբյեկտիվ հետաքննությունը։

«Կարծում եմ, որ բոլորի համար էլ արդեն պարզ է, թե նրանք ինչ առաքելություն են ունեցել ընտրական գործընթացներում և ինչ դեր են ունենալու քննիչ հանձնաժողովում։ Ո՞րն է լինելու իշխանության գլխավոր նպատակը։ Եթե կարճ, ապա մի կողմից թիրախավորել անցանկալի գործիչներին, մասնավորապես բարձրաստիճան զինվորականներին, որոնք հանդես էին գալիս իշխանության դիրքորոշումից տարբերվող դիրքերից, իսկ ոմանք բավականին կոշտ։ Երկրորդ, փակել պատերազմի դաժան էջը և փորձել չեզոքացնել վերոնշյալ խնդրով իշխանության անփառունակ գործունեության, քաղաքականության թեման»,- արձանագրել է «Պատիվ ունեմ» դաշինքի անդամ, անվտանգության հարցերի փորձագետ Տիգրան Աբրահամյանը։

Իսկ այսօր արդեն մամուլը գրել է, թե Փաշինյանի հետ հանդիպմանը փաշինյանականները քննարկել են Գլխավոր շտաբի նախկին պետ Օնիկ Գասպարյանի գլխին պատասխանատվությունը բարդելու, նրան կալանավորելու հնարավորությունը։ Քննիչ հանձնաժողովի ստեղծումը օրակարգային հարց է, իշխանությունն ինքն էլ հասկանում է, որ հնարավոր չի լինելու խուսափել հարցերին պատասխանելուց, և այժմ արդեն մեղավորներ կարգելու փնտրտուքի մեջ են։

Մհեր Կարապետյան