«Սանասա՞ր, թե՞ Բաղդասար»․ բոլորը նույնն են

Հայաստանի պաշտպանության նախարարի պաշտոնակատար Վաղարշակ Հարությունյանն օրեր առաջ հեռացվեց իր զբաղեցրած պաշտոնից: Նախարարի պաշտոնում, ըստ ամենայնի, կնշանակվի Արշակ Կարապետյանը՝ ապրիլյան պատերազմի «հերոսներից» մեկը, որին անփառունակ կերպով վռնդել էին Զինված ուժերի հետախուզության վարչության նախկին պետի պաշտոնից։ Ամիսներ շարունակ լուրեր էին շրջանառվում, որ Վաղարշակ Հարությունյանը նախարարի պաշտոնը լքելուց հետո նշանակվելու է Անվտանգության խորհրդի քարտուղար կամ ՌԴ-ում Հայաստանի դեսպան։ Անվտանգության խորհրդի քարտուղար նրան չնշանակեցին, այդ պաշտոնը բաժին կհասնի ԱԺ նախագահ Արարատ Միրզոյանին։

ՌԴ-ում դեսպանի պաշտոնն էլ փակվեց Վաղարշակ Հարությունյանի համար։ Մեր աղբյուրների փոխանցմամբ՝ Նիկոլ Փաշինյանը չի ցանկանում դեսպան նշանակել ռուսական հատուկ ծառայությունների հետ սերտ առնչություն ունեցող, իր աշխատանքում էլ առանձնապես ակտիվությամբ աչքի չընկած անձի։ Դա է պատճառը, որ Վաղարշակ Հարությունյանը հրաժարվում է շփվել լրագրողների, ընկերների, անգամ՝ ԵԿՄ վերնախավի հետ, որի վարչության անդամ է։ Վաղարշակ Հարությունյանին ազատելը լրջորեն ազդել է ԱԺ Պաշտպանության և անվտանգության հարցերի մշտական հանձնաժողովի նախագահ Անդրանիկ Քոչարյանի վրա։ Քոչարյանը տևական ժամանակ փոձում էր վերահսկողություն սահմանել ուժային կառույցների, առաջին հերթին՝ ՊՆ վրա։ Նիկոլ Փաշինյանը, սակայն, չի ցանկանում թույլ տալ Անդրանիկ Քոչարյանի ազդեցության աճը։ Նրան անընդհատ հիշեցնելու են իր անցյալը 90-ականների Գյումրիում, նախկին իշխանության օդիոզ օլիգարխների հետ սերտ առնչությունը։ Այսկերպ, սեփական թիմի թիկունքում սեփական խաղերը այլևս չեն խրախուսվում Փաշինյանի իշխանության մեջ։ Երեք տարում փաշինյանականները հասկացել են, որ պետք է բռի մեջ հավաքել ողջ իշխանությունը։

Կարեն Գալստյան