Հայաստանի իշխանությունը դարձյալ կիրառելու է պլանավորված պարտության տեխնոլոգիա

Հայաստանի իշխանությունը դարձյալ կիրառելու է պլանավորված պարտության տեխնոլոգիա։ Ձևակերպման հեղինակը Հայաստանի երկրորդ նախագահ Ռոբերտ Քոչարյանն է։ Վերջինս երեկ հարցազրույց է տվել երեք հեռուստաընկերություններին, խոսել ստեղծված իրավիճակից, ընդդիմության պարտության պատճառներից։ Քոչարյանի խոսքով, հայկական շահերին հակասող հերթական փաստաթուղթը ներկայացվելու է որպես փրկություն. այսինքն՝ հասունացվելու է մի վիճակ, որը մատուցվելու ոչ թե պարտություն, այլ փրկություն, ինչը մենք մեկ անգամ արդեն տեսել ենք:

«Ես հիմա ոչնչից չեմ զարմանա, այո, նախապատրաստվում է մի համաձայնագիր, որը չի կարող լինել առանց Հայաստանի կողմից Ադրբեջանի տարածքային ամբողջականության ճանաչման, ինչը կնշանակի խաչ քաշել Արցախի ապագայի վրա», ասել է Ռոբերտ Քոչարյանը:

Բարդ է չհամաձայնվել երկրորդ նախագահի հետ։ Խորհրդարանական արտահերթ ընտրությունների արդյունքները, Նիկոլ Փաշինյանի իշխանության քարոզն ու տարածված թեզերը ապացուցում են, որ Փաշինյանին հաջողվել է համոզել հանրության մի զգալի հատվածին, իբր 44-օրյա պատերազմում կրած խայտառակ պարտությունը փրկություն էր։ Մեկ անգամ հաջողած այս վարքագիծը իշխանությունը կրկին օգտագործելու է իր շահերի համար։ Հատկապես ՌԴ նախագահ Վլադիմիր Պուտինի արձանագրումից հետո, թե «բարդ, սուր և զգայուն հարցեր» են սպասվում, Նիկոլ Փաշինյանն ամեն ինչ անելու է Հայաստանի գլխին կախված սպառնալիքները որպես իր իշխանության հաջող քաղաքականության օրինակ ներկայացնելու։ Բարդ է նաև չհամաձայնվել երկրորդ նախագահի մեկ այլ արձանագրման հետ։

«Նման կարգի պրովոկացիաներից հետո ստեղծվում է մի իրավիճակ, որ նոր պատերազմի վտանգը տեսանելի է դառնում ժողովրդի համար և նա մեծ հեշտությամբ մարսում է հերթական փաստաթղթի ստորագրումը, հերթական զիջումը, որը նա ընդունելու է ոչ թե որպես դավաճանություն, այլ փրկություն», ասել է Ռոբերտ Քոչարյանը։

Այդուհանդերձ, որքան էլ այսօր ընդդիմությունը հայտարարի, թե հանրության զգալի մասը քվե չի տվել Նիկոլ Փաշինյանին, այդ հանրությունը նաև զլացել է գնալ ընտրատեղամասեր և քվե տալ արմատական ընդդիմությանը։ Եվ հետևաբար, այժմ փաշինյանական իշխանության ազգադավ քաղաքականությունը կասեցնելու կարևոր առաքելությունը վերապահված է հենց ընդդիմադիր հատվածին, որը պարտավոր է բաց խոսել ժողովրդի հետ, ներկայացնել իրավիճակը, գործուն քայլեր կատարել՝ անդունդից դուրս գալու համար։ Այլապես, կրկին մնալու ենք ցավալի իրողությունները հետահայաց արձանագրողի դերում։

Գնել Մելիքյան