Սյունիքում կատարվողը՝ անձնական վրեժխնդրության արտահայտություն

Վարչապետի պաշտոնակատար Նիկոլ Փաշինյանը անձնական վրեժ է լուծել Սյունիքի համայնքապետերից և Զանգեզուրի պղնձամոլիբդենային կոմբինատից։ Խորհրդարանական արտահերթ ընտրություններից հետո Սյունիքում Փաշինյանի իշխանության գործողությունները չեն տեղավորվում ողջամիտ տրամաբանության շրջանակներում։ Այս տեմպերով, մարզում մոտ ապագայում որևէ ընտրված քաղաքապետ չի մնա, բոլորին կկալանավորեն, իսկ նրանց փոխարեն պաշտոնակատար կնշանակեն «Քաղաքացիական պայմանագրի» տեղական ակտիվիստներին։ Կալանավորված են Քաջարանի և Մեղրիի քաղաքապետերը, կալանավորելու միջնորդություն է ներկայացվել Սիսիանի և Գորիսի քաղաքապետերի դեմ։ Փաշինյանը չի կարողանում մարսել քարոզարշավի ընթացքում Սյունիքում արժանացած «ողջույնները», և իրավապահ համակարգին հրահանգել է բոլոր հնարավոր և անհնարին մեթոդներով շարունակել հետապնդումները։

Այդ համատեքստում է Քննչական կոմիտեի նախագահի փոփոխությունը, Հայկ Գրիգորյանը չէր համաձայնվել անմռունչ կատարել Նիկոլ Փաշինյանի բոլոր ապօրինի հրահանգները, և նրան փոխարինել են «սև գործերի» վարպետ Արգիշտի Քյարամյանով։ Վերջինս էլ խոստացել է առանց այլևայլությունների կատարել փոքրիկ բռնապետի բոլոր քմահաճույքներն ու ճաղերի ետևն ուղարկել «Վերածնվող Հայաստան» կուսակցության բոլոր ակտիվիստներին ու ընդդիմադիր համայնքապետերին։ Երեկ էլ ԱԱԾ-ն բառացիորեն գրոհել է Զանգեզուրի պղնձամոլիբդենային կոմբինատ, և ձերբակալել անվտանգության ծառայության ղեկավարներին։ Հայաստանի թիվ մեկ հարկատուի դեմ նման արշավանքը հղի է լուրջ տնտեսական վտանգներով։ Կոմբինատի աշխատանքի կազմալուծումը կարող է ազդել մի քանի հազար մարդու վրա, Սյունիքում լուրջ սոցիալ-տնտեսական խնդիրներ հարուցել։ Այդ փաստը, սակայն, չի հուզում Փաշինյանին, անձնական վրեժին հագուրտ տալու համար նա պատրաստ է ցանկացած ապօրինության։

Գևորգ Հայրապետյան