Վահան Քերոբյանը հանդիպել է ռուս գործընկերոջ հետ. ի՞նչ են պայմանավորվել

ՀՀ էկոնոմիկայի նախարարի պաշտոնակատար Վահան Քերոբյանը ՌԴ կատարած աշխատանքային այցի շրջանակում հանդիպել է ռուս գործընկերոջս՝ Մաքսիմ Ռեշետնիկովի հետ։ Նա հանդիպման մասին գրել է Facebook–ում։

«Պայմանավորվել ենք ստեղծել տնտեսական համագործակցության նոր ծրագիր և ձևավորել ներդրումային համագործակցության նոր աշխատանքային խումբ։ Հաջորդ հանդիպմանը կքննարկենք համագործակցության ճանապարհային քարտեզը՝ հստակ նախագծերով»,– նշել է նա։

Ըստ պաշտոնյայի` նոր համագործակցությունը կծավալվի էներգետիկայի, լոգիստիկ կենտրոնների ստեղծման, տեղեկատվական անվտանգության, մետաղագործության, քիմիական արդյունաբերության, հեռաբուժության (телемедицина), «խելացի եւ անվտանգ քաղաքի» և գինեգործության ոլորտներում։

Հիշեցնենք, որ ՀՀ էկոնոմիկայի նախարարի պաշտոնակատար Վահան Քերոբյանի գլխավորած պատվիրակությունը հուլիսի 5-ին մեկնել է ՌԴ՝ մասնակցելու «Իննոպրոմ-2021» միջազգային արդյունաբերական 11-րդ ցուցահանդեսին և ցուցահանդեսի շրջանակում կազմակերպվող միջոցառումներին: