Նիկոլ Փաշինյանը շարունակում է քանդել Զինված ուժերը․ նոր թիրախը գեներալ Խաչատուրովն է

Հայաստանի ռազմաքաղաքական ղեկավարությունը որոշում է կայացրել չերկարացնել N զորամասի հրամանատար գեներալ-մայոր Գրիգորի Խաչատուրովի պայմանագիրը, և հուլիսի 7-ից նա զորացրվելու է և լքելու զինված ուժերը։ Գրիգորի Խաչատուրովը ՀՀ երկարամյա ԶՈՒ ԳՇ պետ Յուրի Խաչատուրովի որդին է, 2020 թվականի հունիսին Տավուշում մարտական գործողությունների ժամանակ հենց նրա ղեկավարած ստորաբաժանումն էր իրականացրել հաղթական գործողությունը, որը 44-օրյա պատերազմից առաջ Նիկոլ Փաշինյանի հպարտության գլխավոր աղբյուրն էր դարձել։ Արցախյան 44-օրյա պատերազմի ժամանակ էր Խաչատուրովի ղեկավարած ստորաբաժանումն անառիկ է պահել Տավուշի սահմանները, թշնամին այդ ուղղությամբ հարձակումներ չի ձեռնարկել՝ հրաշալի հասկանալով, որ այդ ուղղությամբ հայկական դիրքերն ամուր են, հրամանատարն էլ պինդ զինվորական է և չի ընկրկի։

Յուրի Խաչատուրովին ՀԱՊԿ գլխավոր քարտուղարի պաշտոնից հետ կանչելուց հետո քրեական հետապնդման էին ենթարկում, փորձեցին կալանավորել։ Յուրի Խաչատուրովը նաև ակտիվորեն մասնակցում էր ընդդիմադիր հիմնական ուժի՝ «Հայաստան» դաշինքի քարոզարշավին։ Հոր նկատմամբ իշխանության հետապնդումները, սակայն, չխանգարեցին Գրիգորի Խաչատուրովին փայլուն ծառայություն իրականացնել՝ հանուն Հայաստանի Հանրապետության, չխառնվել քաղաքական գործընթացներին, կատարել միայն զինվորական պարտականությունները։ Խորհրդարանական ընտրություններում ևս Գրիգորի Խաչատուրովը ապօրինություններով աչքի չի ընկել։ Սա է թերևս պատճառը, որ Նիկոլ Փաշինյանը ցանկանում է ազատվել անվանի գեներալից, նրա փոխարեն նշանակել վստահելի և իր ապօրինություններն անմռունչ կատարող որևէ խամաճիկի։ Հատկապես հիմա, երբ կրկին խոսակցություններ են շրջանառվում Տավուշի անկլավային տարածքները Ադրբեջանին վերադարձնելու՝ Փաշինյանի պարտավորությունների մասին, Գրիգորի Խաչատուրովի ներկայության պայմաններում բարդ կլինի գլուխ բերել հայրենադավ այս գործարքը։ Եվ այժմ Խաչատուրովից ազատվելու հապշտապությունը վկայում է, որ Ադրբեջանին հաճոյանալու համար Փաշինյանը շտապում է։ Շտապում է քանդել հայկական բանակը, ազատվել հայրենասեր և ամուր զինվորականներից։ Օրեր առաջ էլ զորացրեցին Ագարակի զորամասի հրամանատար Արգամ Գևորգյանին, ով նույնպես օրինակելի և փորձառու հրամանատար էր։ Բոլոր այս դեպքերը փաստում են՝ կանգնած ենք վտանգավոր զարգացումների առաջ։

Արմեն Մուրադյան