ԱՄՆ վարչակազմի կողմից շնորհավորանքը սպասելի էր
ՔԱՂԱՔԱԿԱՆՈՒԹՅՈՒՆ
ԱՄՆ նախագահ Բայդենը խորհրդարանական ընտրությունների կապակցությամբ շնորհավորել է Հայաստանի ժողովրդին և Փաշինյանին:
Այս թեմայով զրուցել ենք միջազգայնագետ Սուրեն Սարգսյանի հետ։
Հարցին, թե սպասելի էր այդ ամենը` միջազգայնագետը պատասխանել է․ «Բնականաբար սպասելի էր, որ ԱՄՆ նախագահի կողմից պետք է շնորհավորանք լինի, ինչպես ԵԱՀԿ Մինսկի խմբի համանախագահ մյուս երկրների կողմից այդ շնորհավորանքը եղավ: Կարծում եմ, որ կշնորհավորեն նաև վարչապետի պաշտոնը ստանձնելու կապակցությամբ: Սա, ընդհանուր առմամբ, ընդունված պրակտիկա է, երբ Հայաստանի բոլոր ղեկավարները Միացյալ Նահանգներից և այլ պետություններից շնորհավորանքներ են ստացել պաշտոնում ընտրվելու և վերընտրվելու կապակցությամբ»։
Անդրադառնալով այն հարցին, թե ի՞նչ է նշանակում Բայդենի այն հայտարարությունը, որ իրենք հավատարիմ են Հայաստանի հետ համագործակցության ամրապնդմանը` Սուրեն Սարգսյանը պատասխանել է․ «Այդ հայտարարությունը նորություն չէ, ստանդարտ հայտարարություն է, քանի որ տարբեր ժամանակներում Վաշինգտոնի կողմից Հայաստանի հետ հարաբերությունները զարգացնելու մասով հայտարարություններ հնչել են: Ոչ մի բացառիկ բան, կարծում եմ՝ չկա»։
Սոնա Գիշյան
