Փոխվարչապետ Մհեր Գրիգորյանը նոր խորհրդական ունի․ նա արդեն ԱՄՆ է գործուղվել

Հունիսի 24-ին փոխվարչապետի պաշտոնակատար Մհեր Գրիգորյանը որոշում է ստորագրել, որում ասվում է․

«Ղեկավարվելով «Հանրային ծառայության մասին» Հայաստանի Հանրապետության օրենքի 9-րդ հոդվածի 14-րդ մասով՝ Սեդրակ Բարսեղյանին 2021 թվականի հունիսի 25-ից նշանակել փոխվարչապետ Մհեր Գրիգորյանի խորհրդական»։

Մհեր Գրիգորյանի հաջորդ իսկ որոշմամբ, Բարսեղյանը գործուղվել է ԱՄՆ․

«Ղեկավարվելով «Հանրային ծառայության մասին» Հայաստանի Հանրապետության օրենքի 9-րդ հոդվածի 23-րդ մասով և «Նորմատիվ իրավական ակտերի մասին» Հայաստանի Հանրապետության օրենքի 39-րդ հոդվածով՝

1. Սիրաքյուսի համալսարանի հանրային կառավարման և քաղաքացիության Մաքսուելլի դպրոցի հանրային կառավարման մագիստրոսական ծրագրին մասնակցելու նպատակով՝ Հայաստանի Հանրապետության փոխվարչապետ Մհեր Գրիգորյանի խորհրդական Սեդրակ Բարսեղյանին 2021 թվականի հունիսի 28-ից մինչև 2022 թվականի հունիսի 27-ը ներառյալ առանց աշխատավարձի պահպանման գործուղել Ամերիկայի Միացյալ Նահանգներ (Նյու Յորք):

2. Հայաստանի Հանրապետության փոխվարչապետ Մհեր Գրիգորյանի խորհրդականին՝ գործուղումից վերադառնալուց հետո եռօրյա ժամկետում Հայաստանի Հանրապետության վարչապետի աշխատակազմ ներկայացնել գործուղման արդյունքների մասին հաշվետվություն:
3. Ընդունել ի գիտություն, որ գործուղման բոլոր ծախսերը հոգում է հրավիրող կողմը»։

Նշենք, որ Սեդրակ Վարդանյանը շուրջ 8 տարի է, ինչ աշխատում է Կառավարությունում․

2007-2011թթ.-«Զվարթնոց Հենդլինգ» ՓԲԸ` հաշվառող, վերահսկիչ

2011-2013թթ.-ՀՀ ֆինանսների նախարարի օգնական
2013 մայիս-հոկտեմբեր-ՀՀ կառավարության աշխատակազմի ղեկավարի խորհրդական
2013 -2016թթ.  –  ՀՀ կառավարության աշխատակազմի ղեկավար-նախարարի խորհրդական
2016թ. փետրվար-հուլիս – ՀՀ միջազգային տնտեսական ինտեգրման և բարեփոխումների նախարարության աշխատակազմի ղեկավարի պաշտոնակատար
2016թ. հուլիս-սեպտեմբեր – ՀՀ կառավարության աշխատակազմի ղեկավար-նախարարի խորհրդական
2016 թ. սեպտեմբերի 20 – 2017 թ. փետրվարի 2՝ ՀՀ կառավարության աշխատակազմի պետաիրավական վարչության պետի պաշտոնակատար
2017-2018 թթ. – ՀՀ կառավարության աշխատակազմի պետաիրավական վարչության պետ
2018-2021 թթ. – Փոխվարչապետ Մհեր Գրիգորյանի գրասենյակի ղեկավար
2021 թ. հունիսի 25-ից նշանակվել է փոխվարչապետ Մհեր Գրիգորյանի խորհրդական