Նիկոլ Փաշինյանը շարունակում է հանիրավի մեղադրանքներ հնչեցնել եկեղեցու հասցեին. Մայր աթոռ
ՀԱՍԱՐԱԿՈՒԹՅՈՒՆ
Մայր աթոռի տեղեկատվական համակարգը հայտարարությւոն է տարածել` անդրադառնալով «Քաղաքացիական պայմանագիր» կուսակցության վարչապետի թեկնածու Նիկոլ Փաշինյանի` եկեղեցու հասցեին արած արտահայտություններին։
Հունիսի 12-ին Սևանում իր քարոզարշավի ժամանակ Փաշինյանն ասել էր, որ վերջին տարիներին և վերջին օրերին հոգևոր էլիտայի ներկայացուցիչներն ամեն ինչ արել են Հայաստանի կառավարությանը սեփական կամքը պարտադրելու, հեղափոխությունը ձախողելու համար։ Նրա խոսքով՝ այսօր իրենց մեղադրում են, թե փորձում են վարկաբեկել Հայ առաքելական եկեղեցին, ավանդական արժեքները, սակայն դրանք վարկաբեկում են կոռումպացված հոգևորականները։ Նա հավելել էր, որ չի պատասխանելու հոգևորականների քստմնելի հայտարարություններին և միայն Աստվածաշնչով է արձագանքելու դրանց։
«Նախընտրական քարոզարշավի շրջանակներում «Քաղաքացիական պայմանագիր» կուսակցության վարչապետի թեկնածու Նիկոլ Փաշինյանը շարունակում է հանիրավի մեղադրանքներ հնչեցնել Հայոց եկեղեցու հասցեին։ Եկեղեցու և ազգային-հոգևոր արժեքների հանդեպ ներկա իշխանության վերաբերմունքը մեր ժողովրդին հայտնի է։ Այս համատեքստում պետք է դիտարկել վարչապետի պաշտոնակատարի կողմից եկեղեցու և եկեղեցականների նկատմամբ դրսևորված վարքագիծը»,–ասված է Մայր աթոռի հայտարարության մեջ։
Մայր աթոռը հավելում է, որ եկեղեցին, հակառակ ամեն տեսակ խոչընդոտի և իշխանությունների կեցվածքի, շարունակելու է անշեղորեն իրականացնել հոգեփրկչական և ազգապահպան իր առաքելությունը հայ ժողովրդի կյանքում։
Հիշեցնենք, որ Դիլիջանում քարոզարշավի ընթացքում Փաշինյանը հայտարարել էր, որ էլիտաները՝ հոգևորից մինչև քաղաքական, պետք է խոնարհվեն սեփական ժողովրդի առաջ։
«Դուք տեր չեք, դուք այլևս ծառա եք, դուք այլևս Հայաստանում չեք լինելու տեր»,–ասել էր Փաշինյանը։
Սա քննարկումների թեմա էր դարձել սոցցանցերում։
