Նիկոլ Փաշինյանը հանուն իշխանության հատում է բոլոր կարմիր գծերը

Հայաստանում ընթացող նախընտրական քարոզարշավն իր թեժությամբ չի զիջում հնդկական և ոչ մի սերիալի, իսկ մասնակիցների հռետորաբանությունն արդեն հարուցել է իրավապաշտպանների վրդովմունքը։

«Խիստ մտահոգիչ է մթնոլորտը, որում ընթանում է նախընտրական քարոզարշավը: Դա խորացնում է հասարակությունում բևեռացվածությունը, խարխլում է երկրում համերաշխությունը վերականգնելու հեռանկարը:  Այսպես շարունակել չի՛  կարելի»,- արձանագրել է ՀՀ ՄԻՊ Արման Թաթոյանը:

Իսկապես, թեկնածուներից մեկը քաղաքական վենդետաներ ու կադրային ջարդուփշուր է խոստանում, հայհոյանքներ տալիս,  մեկ ուրիշն՝  ազդարարում, որ պատասխանատուները գնդակահարությունով չեն պրծնելու,  երրորդը՝  մենամարտի է հրավիրում։  

«ՀՀ վարչապետի պաշտոնակատարի կողմից այսօր քաղաքացիական և քաղաքական վենդետաների, քաղաքացիական վրեժի, կադրային ջարդուփշուրի մասին խոստումները,  հայհոյանքի բառերի օգտագործումը խիստ մտահոգիչ են.  այսպիսի բառապաշար հանրային, այն էլ ընտրական գործընթացի տիրույթ բերելն անթույլատրելի է»,- նույն այդ հայտարարության մեջ նշել է Արման Թաթոյանը։

Տպավորություն է,  թե Նիկոլ Փաշինյանն իր բոլոր ուժերը նետել է՝ ամեն գնով վերարտադրվելու համար  և չի խորշում հատել մարդկային ու բարոյական բոլոր կարմիր գծերը։  Երեկ էլ նա վերահաստատել է իր հայտարարությունը, թե պատրաստ է իր որդուն՝ Աշոտ Փաշինյանին,  փոխանակել  գերեվարվածների հետ։ Եթե առաջին հայտարարությունը մեծ վերապահումներով կարելի էր համարել քարոզչական հնարք, ապա երեկվա պնդումն արդեն վկայում է՝ գործ ունենք հոգեկան խնդիրներ ունեցող և երկրի ու սեփական ընտանիքի համար վտանգ ներկայացնող անձի հետ։

Սոցցանցերում արդարացիորեն նշում են,  նա,  ով չի գնահատում սեփական որդու կյանքը,  չի կարող գնահատել և արժևորել այլոց  որդիների կյանքը։ 

Միգուցե ժամանակն է,  որ «Քաղաքացիական պայմանագիրը» հրճվանքով ծափահարելու փոխարեն մեկուսացնի իր առաջնորդին և մի լավ հոգեբույժ հրավիրի՝ նրան բուժօգնություն ցուցաբերելու համար։

Արմեն Սուքիասյան