Այլևս չեմ կատարում ԱԳՆ մամուլի քարտուղարի պարտականությունները․ Աննա Նաղդալյան
ՔԱՂԱՔԱԿԱՆՈՒԹՅՈՒՆ
ՀՀ ԱԳՆ մամուլի քարտուղար Աննա Նաղդալյանը հրաժարվել է մամուլի քարտուղարի իր պարտականություններից։
Հիշեցնենք, որ ավելի վաղ հրաժարական էր տվել արտգործնախարարի պաշտոնակատար Արա Այվազյանը։ Այսօր նա հրաժեշտի հանդիպում էր ունեցել դիվանագետների հետ։ «Երբևիցե որևէ կասկած չլինի, որ նախարարությունը կարող է ինչ-որ քայլ անել կամ համաձայնություն տալ նախաձեռնությունների, որոնք պետականության, ազգային շահի դեմ են»,- հրաժեշտի խոսքում ասել էր նա։
Այդ մասին նա գրառում է արել ֆեյսբուքյան իր էջում։
«Հարգելի գործընկերներ,
Տեղեկացնեմ, որ այլևս չեմ կատարում ՀՀ ԱԳՆ մամուլի քարտուղարի պարտականությունները: Ցանկանում եմ շնորհակալություն հայտնել ԶԼՄ բոլոր ներկայացուցիչներին, ԱԳՆ գործընկերներիս, իմ թիմին՝ այս դժվարին և պատասխանատու ժամանակահատվածում արդյունավետ համագործակցության և աջակցության համար:
Առանձնահատուկ շնորհակալություն եմ հայտնում Արա Այվազյանին և Զոհրաբ Մնացականյանին՝ ցուցաբերած վստահության համար. մեծ պատիվ էր աշխատել նման փորձառու և հայրենասեր դիվանագետների հետ:
Հայտնում եմ, որ շարունակելու եմ աշխատանքս դիվանագիտական ծառայությունում:
ԱԳՆ գործունեության վերաբերյալ մեկնաբանությունների և այլ հարցերի համար կարող եք դիմել [email protected] էլեկտրոնային հասցեով»:
