Խորհրդային զորահրամանատար Իվան Բաղրամյանի արձանը կարող է հայտնվել Մոսկվայում
ՄՇԱԿՈՒՅԹ
riamo.ru-ն գրում է, որ Մոսկվայի քաղաքային դումային կից հուշարձանային արվեստի հանձնաժողովը սատարել է Նիժեգորոդսկայա փողոցում գտնվող դպրոցի տարածքում խորհրդային զորահրամանատար Իվան Բաղրամյանի կիսանդրու տեղադրմանը:
Հուշարձանը տեղադրելու առաջարկը եղել է Ռուսաստանում Հայաստանի դեսպան Վարդան Տողանյանի կողմից:
«Արձանի տեղադրման վայրը Խորհրդային Միության մարշալ Իվան Բաղրամյանի անվան թիվ 1222 դպրոցն է», - ասել է Մոսկվա քաղաքի մշակութային ժառանգության վարչության հուշարձանների, հուշատախտակների և հուշանշանների բաժնի վարիչ Սերգեյ Պոլովինկինը:
Ենթադրվում է, որ հուշարձանը կտեղադրվի Ռուսաստանում Հայաստանի դեսպանատան միջոցների հաշվին:
Իվան Բաղրամյանը հայկական ծագմամբ խորհրդային զորավար է, Խորհրդային Միության մարշալ, Հայրենական մեծ պատերազմի մասնակից, Խորհրդային Միության կրկնակի հերոս, Լենինի յոթ շքանշանների ասպետ:
Նյութը հրապարակման պատրաստեց Կամո Խաչիկյանը
