Հնդիկ քաղաքական գործիչը հայտարարել է կորոնավիրուսի կյանքի իրավունքի մասին

Lenta.ru-ն գրում է, որ Հնդկաստանի Ուտառախանդ նահանգի նախկին վարչապետ Տրիեվենդրա Սինգհ Ռավանը հայտարարել է կորոնավիրուսի կյանքի իրավունքի մասին: Այս մասին հայտնել է Navbharat Times-ը:

Ըստ նրա՝ փիլիսոփայական տեսանկյունից SARS-CoV-2 վիրուսը նույնպես կենդանի օրգանիզմ է, որը ցանկանում է ապրել ինչպես և մարդիկ: Այնուամենայնիվ, մարդիկ իրենց համարում են ամենախելացի և փորձում են ոչնչացնել կորոնավիրուսը, ուստի այն անընդհատ մուտացիայի է ենթարկվում: Ռավանը նաև ավելացրել է, որ հիվանդության դեմ պայքարելու համար մարդկությունը պետք է սովորի կանխատեսել կորոնավիրուսի վարքը: Ավելի վաղ, հաղորդվել էր, որ Հնդկաստանի Գուջարաթ նահանգի բնակիչները սկսել են պաշտպանվել կորոնավիրուսից  կովի կաթի, թրիքի և մեզի միջոցով: Նրանք ամբողջ մարմնի վրա քսում են կենդանիների սեկրեցների խառնուրդը, սպասում են մինչև այն ամբողջովին չորանա, իսկ հետո լվանում են կաթով: Հնդիկ հավատացյալները վստահ են, որ նման ընթացակարգերը օգնում են խուսափել վարակից և ամրապնդել իմունիտետը:

Միևնույն ժամանակ, Հնդկաստանը COVID-19-ից մահացության աճի հակառեկորդ է: Երկրի Առողջապահության նախարարության տվյալներով՝ Հնդկաստանում օրական վիրուսից ու հարակից հիվանդություններից մահանում է մոտ 4 000 մարդ: Ընդհանուր առմամբ, երկրում ավելի քան 24 միլիոն մարդ է վարակվել կորոնավիրուսով: