ԿԳՄՍՆ-ում 450 միլիոնի մեկ անձից գնում են կատարել մեկ շաբաթում

Կրթության, գիտության մշակույթի և սպորտի նախարարությունն այս շաբաթ  297 միլիոն դրամ է հատկացրել պետական բյուջեից և մեկ անձից գնում է կատարել «Զանգակ-97» ՍՊԸ-ից։ 

Նախարարությունն առանց մրցույթ հայտարարելու գումարը հատկացրել է մեկ ընկերության՝ դասագրքեր գնելու նպատակով։ Հրատարակչության հետ պայմանագիրը նախարարությունը կնքել է մայիսի 7-ին։ 

Կրթության, գիտության, մշակույթի և սպորտի նախարարությունն այս շաբաթ ևս մեկ գնում է կատարել ու դարձյալ նախընտրել է  մեկ անձից։ 
ՀՀ Կոտայքի մարզի Չարենցավան համայնքի «Ճանապարհաշինարարներ» արձանի վերականգնման աշխատանքները կատարելու համար, առանց մրցույթ հայտարարելու, նախարարությունը 141 միլիոն դրամի պայմանագիր է կնքել «Մանուկյան Քնսթրաքշն» ընկերության հետ, որպեսզի 180 օրվա ընթացքում ընկերությունը վերանորոգի «Ճանապարհաշինարարներ» արձանը։ 

Մեկ անձից գնումները կատարվում են հրատապ դեպքերի ժամանակ, բայց թե որքանով է հրատապ արձանի վերանորոգումը կամ դասագրքերի գնումը` հայտնի չէ։