Ինչի՞ն եք ծափ տալիս, դուք ամոթ, հայրենիք ունե՞ք

Այսօր ազգային ժողովում միտինգ էր: Հիմնական հռետորը, պատահականությամբ և ի դժբախտություն հայ ազգի, վարչապետի աթոռը բռնազավթած Նիկոլ Փաշինյանն էր: Այն, ինչ խոսում էր այդ մարդը, ուղղակի ծաղր էր հայ ժողովրդի ու մեր պետականության նկատմամբ: Ծաղր էր զոհված հազարավոր զինծառայողների և նրանց ընտանիքների, հաշմանդամ դարձած հազարավոր տղերքի, տուն ու հայրենիք կորցրած տասնյակ հազարավոր մեր հայրենակիցների նկատմամբ: Անամոթաբար կեղծում էր փաստերը, խեղում պատմությունը, բայց միևնույն ժամանակ առանց խղճի ու ամոթի զգացումով հայտարարում, որ Արցախն ու Հայաստանը ապագա ունեն:

Մարդը, որը հանձնել է Արցախը, կործանման եզրին հասցրել Հայաստանը, ասում է, որ հայկական երկու պետությունները ապագա ունեն: Այո, ունեն, բայց ոչ «կապիտուլյանտի» ու պաթոլոգիկ ստախոսի հետ: Կրկնակի դժմախտությունն այն էր, որ նրա ելույթն ուղեկցվում էր իշխող խմբակցության ծափերով: Ինչի՞ն եք ծափ տալիս «ուսապարկեր», քաղաքական անմեղսունակությամբ տառապող կոճակ սեղմողներ: Ծափ եք տալիս հայրենիքից 10000 քառակուսի կիլոմետրի կորստի՞ն, 5000-ից ավելի զոհերի առկայությա՞նը, մի ողջ սերունդ հաշմանդամ դարձնելո՞ւն, ինչի՞ն: Դուք ամոթ ունե՞ք, դուք հայրենիք ունե՞ք, դուք բարոյականություն ունե՞ք: Նիկոլ Փաշինյանը հեռանալու է, կամ հեռացվելու է ու շատ ցավոտ: Նրա ամեն վայրկյան ավել իշխանության ղեկին մնալը, ավելի ցավոտ է դարձնելու անկումը: Նա դա հասկանում է, հասկանում է, դրա համար վերջին ճիգերն է գործադրում, վերջին ստերի ու կեղծիքների չափաքանակն է նետում շրջակա միջավայր իշխանությունը պահելու համար: Սակայն ապարդյուն, հայ ժողովուրդը հասկացել է, թե ինչ ազգակործան պատուհասի հետ գործ ունի:

Այդ մարդը հատել է բոլոր կարմիր գծերը, նվաճել քաղաքական անբարոյականության բոլոր հնարավոր բարձունքները: Եթե ինչ-որ մի պահ, դիցուք, կարծում էի, որ այդուհանդերձ կարելի է գնալ ընտրությունների ու նրան հաղթել ընտրություններով, հիմա, վստահ եմ, որ գործը ընտրություններին չպիտի հասնի, քանի որ Նիկոլ Փաշինյանն իր իշխանությունը պահելու համար ամեն ինչի ընդունակ է: Այդ ընտրությունների վերջը նորանոր ցնցումներն են, քաղաքացիական բախումներն ու արյունն է: Նա արյան է տենչում, այդպիսին եղել է միշտ: Հայ ժողովուրդը, Հայաստանն ու Արցախը կանգնած են կոնկրետ ջրբաժանի առաջ՝ կա՛մ Նիկոլը, կա՛մ Հայաստանն ու հայ ազգը: Ուրիշ ընտրություն չկա, պարզապես չկա:

Կարեն Դանիելյան

www.1or.am