Կայացել է «Միացյալ Հայաստան» կուսակցության հիմնադիր համագումարը, որի նախագահ է ընտրվել Երվանդ Թարվերդյանը
ՀԱՍԱՐԱԿՈՒԹՅՈՒՆ
Այսօր, ապրիլի 10-ին տեղի է ունեցել «Միացյալ Հայաստան» նորաստեղծ կուսակցության հիմնադիր համագումարը, որի ժամանակ կուսակցության նախագահ է ընտրվել Երվանդ Թարվերդյանը:
«Հաջողակ գործարար է, հասարակական ակտիվ գործիչ», -համագումարում այսպես ներկայացրին Երվանդ Թարվերդյանին:
««Միացյալ Հայաստան» կուսակցության նպատակը ստեղծված բարդ իրավիճակում ազգը համախմբելն է՝ ստեղծելով հզոր հայրենիք՝ ազատ քաղաքացիներով ու ամուր բանակով: «Միացյալ Հայաստան» կուսակցության հիմնադրումը հերթական մոդայիկ երևույթը չէ, այլ ինքնաբուխ անհրաժեշտություն», -կուսակցության համագումարում ունեցած ծրագրային ելույթում հայտարարեց Երվանդ Թարվերդյանը:
«Միացյալ Հայաստան» կուսակցությունը հավակնում է մասնակցել հայտարարված արտահերթ խորհրդարանական ընտրություններին, եթե դրանք կայանան: «Ավելին, «Միացյալ Հայաստան» կուսակցությունը մասնակցելու է Հայաստանում այսուհետև կայանալիք բոլոր համապետական ընտրություններին: Մենք երկրի կառավարման մեջ ունենալու ենք լայն մասնակցություն», -հայտարարել է նա:
Բացի այդ, ըստ նորաստեղծ կուսակցության նախագահի, կուսակցությունը ներկայացված է լինելու Ռուսաստանի Դաշնությունում, ԱՄՆ-ում և եվրոպական շատ երկրներում:
