Եթե ես վարչապետ լինեի, մենք պատերազմը կհաղթեինք. Հրանտ Բագրատյան

Մեր անապահովության աղբյուրը ոչ թե Թուրքիան է կամ Ադրբեջանը, այլ Նիկոլ Փաշինյանը, եկեք հանենք էս մարդուն: Այս մասին, այսօր՝ ապրիլի 9-ին, մամուլի ասուլիսի ժամանակ նշեց նախկին վարչապետ Հրանտ Բագրատյանը:

«Մեկ անգամ չէ, որ ապացուցել եմ, որ եթե ես վարչապետ լինեի, մենք պատերազմը կհաղթեինք: Մենք հաղթելու 10 անգամ ավելի շատ շանս ունեինք, քան 1998-ին: Երբեք մենք այդքան հզոր չենք եղել: Նա ամբողջ քարոզչությունը տանում է նրան, որ գցի նախկինների վրա: Իսկ 2020-ի հունիսին ասում էր՝ տեսեք, ինչ բանակ եմ ստեղծել»,-ասաց նա:

Բագրատյանը համոզմունք հայտնեց, որ Նիկոլ Փաշինյանը արդեն փողային հարաբերությունների մեջ է մտել թուրքական աշխարհի հետ. «Նա ընկել է փոսը: Շարունակվելու են զիջումները: Նիկոլը ամբողջությամբ գտնվում է Ալիեւի եւ Էրդողանի ձեռքում, ասելու են՝ այ էս փաստերը կշպրտենք մամուլ»:

Ինչ վերաբերում է գերիների խնդրին, Բագրատյանը վստահ է, որ Ադրբեջանը բոլոր գերիներին վերադարձնելու է. «Գերիներին Ադրբեջանը հետ է տալու, գերիներին վերադարձնելու խնդիրը նաեւ միջազգային հանրության խնդիրն է, պետք է աշխատել այդ ուղղությամբ: Ալիեւն անում է սովորական խուլիգանական շանտաժ, բայց եթե ՀՀ ղեկավարը լինեմ ես, կամ մեկ այլ լուրջ մարդ, Ալիեւը կհասկանա, որ ինքը չի կարող դա որպես շանտաժ օգտագործել»: