Զոհերի նույնականացման` արտերկրում և ՀՀ-ում արված ԴՆԹ-ի արդյունքները նույնն են. նախարար

ՀՀ առողջապահության նախարար Անահիտ Ավանեսյանը հաստատեց` զոհված զինծառայողների աճյունների և մասունքների ԴՆԹ փորձաքննություն նաև դրսում է արվում` ծնողներն են նման ցանկություն հայտնում և նախաձեռնում։ Կառավարության նիստից հետո Ավանեսյանը լրագրողների հետ զրույցում նշեց, որ նման դեպքերը շատ չեն, սակայն դա մարդու իրավունքն է։

Նշենք, որ մամուլում լուրեր էին շրջանառվում, որ կան ծնողներ, որոնք չեն վստահում մեզ մոտ իրականացվող փորձաքննությանը և նմուշներն ուղարկում են արտերկիր։

«Մենք որևէ խնդիր չունենք այս առումով։ Ավելին, մենք ևս աջակցում ենք, որպեսզի ամբողջ պրոցեսն արագությամբ կազմակերպվի։ Մինչ այս պահն արտերկրում և մեր երկրում իրականացրած փորձաքննությունների արդյունքներն իդենտիկ նույնն են եղել»,–ասաց նախարարը։

Նշենք, որ առողջապահության նախարարությունը մեր գրավոր հարցմանն ի պատասխան հայտնել էր` մարտի 31-ի դրությամբ կատարվել է 3723 դիակի և մասունքի դատաբժշկական փորձաքննություն։ Նույն օրվա դրությամբ առկա է 238 մարմնի և մասունքի փորձանմուշ, որոնք պետք է անցնեն հետազոտություններ։

ՊՆ–ն էլ իր հերթին հայտնել էր, որ մարտի 31-ի դրությամբ արցախյան վերջին պատերազմի ժամանակ հաշվառվել է 3049 զոհված անձ։