Հայաստանը կարող է չինական բիզնեսի համար կարեւոր հարթակ դառնալ. ՀՀ վարչապետ

Վարչապետ Կարեն Կարապետյանն այսօր ընդունել է Հայաստանում Չինաստանի արտակարգ եւ լիազոր դեսպան Թիան Էրլունին: Կառավարության մամլո ծառայության փոխանցմամբ, վարչապետը կարեւորել է Չինաստանի հետ հարաբերությունների շարունակական ընդլայնումն ու ակտիվացումը եւ նշել, որ անհրաժեշտ է հստակ քայլեր ձեռնարկել՝ տնտեսական համագործակցության հետագա զարգացմանն ուղղված առկա մեծ ներուժի իրացման ուղղությամբ:

Կարեն Կարապետյանն ընդգծել է մեր երկրի ենթակառուցվածքային մի շարք ծրագրերում չինական բիզնեսին ներգրավելու հնարավորությունը եւ ավելացրել, որ կառավարությունը պատրաստ է մանրամասն քննարկման առարկա դարձնել բոլոր առաջարկները: Վարչապետի խոսքով՝ Հայաստանը կարող է չինական բիզնեսի համար կարեւոր հարթակ դառնալ՝ նաեւ երրորդ երկրներ մուտք գործելու տեսանկյունից:

Թիան Էրլունը նշել է, որ իր առաքելությունն է նպաստել հայ-չինական հարաբերությունների զարգացմանը եւ ավելացրել, որ հատկապես կարեւորում է տնտեսական փոխգործակցության խորացումը տարբեր ուղղություններով: Դեսպանն ընդգծել է, որ ՀՀ վարչապետի ուղերձը կփոխանցի իր երկրի կառավարությանը: