ԱԴԾ-ի հատուկ գործողությունը․ ՌԴ–ում կրկին ահաբեկիչներ են ձերբակալվել (տեսանյութ)
ՀԱՍԱՐԱԿՈՒԹՅՈՒՆՌուսաստանի 10 տարածաշրջանում իրականացված հատուկ գործողության շրջանակում ուժայինները «Հիզբ ութ–Թահրիր» միջազգային ահաբեկչական կազմակերպության անդամների են ձերբակալել։ Տեղեկությունը հայտնում է ՌԻԱ Նովոստին՝ հղում անելով Ռուսաստանի ԱԴԾ մամուլի ծառայությանը։
Նշվում է, որ յոթ ձերբակալվածների դեմ արդեն քրեական գործեր են հարուցվել։
Հատուկ գործողությունն իրականացվել է Ղրիմում, Մոսկվայում, Սանկտ Պետերբուրգում, Պրիմորեի և Կրասնոդարի երկրամասերում, Բաշկիրիայում, Դաղստանում, ինչպես նաև Օրյոլի, Կալուգայի և Իվանովոյի մարզերում:
Պարզվել է, որ կառույցի անդամները Ռուսաստանի բնակիչների շրջանում իսլամիստական ահաբեկչական ռազմատենչ գաղափարախոսություն են տարածել, որը զուգակցվել է այլ կրոնների նկատմամբ անհանդուրժողականության հետ, ինչպես նաև ռուսաստանցի մահմեդականների հավաքագրում են իրականացրել միջազգային ահաբեկչական կազմակերպության շարքերին միանալու համար:
Քարոզչական գործունեության ընթացքում նրանք կիրառել են այսպես կոչված «համաշխարհային խալիֆայության» ստեղծման և հռչակման դոկտրինը, որը պետք է հաստատվի զինվորական հեղաշրջումների և «իսլամական հեղափոխությունների» ընթացքում աշխարհիկ կառավարությունների տապալման ճանապարհով։
Ձերբակալվածների բնակության վայրերում խուզարկություններ են կատարվել, առգրավվել են քարոզչական նյութեր, կապի միջոցներ, տեղեկատվության էլեկտրոնային կրիչներ:
«Հիզբ ութ-Թահրիր»-ը ՌԴ-ում արգելված ահաբեկչական կազմակերպություն է:
