Անհեռատեսության ու պրիմիտիվության պտուղները

Վերջին շրջանում, շատ հաճախ լսում ենք Նիկոլ Փաշինյանից հերթական «գցվածի» մասին։ Քանի օր առաջ «գցվածի» վիճակում պատերազմի հրամանատարներից Վահան Բադասյանն էր, ով 18-ի հեղափոխության ակտիվ մասնակիցներից ու Նիկոլի հավատարիմ զինակիցներից էր, իսկ պատերազմից ու իր հայրենիքի կորստից հետո սկսեց դաժանաբար քննադատել և անգամ հաշվեհարդարով սպառնալ Նիկոլ Փաշինյանին, արդյունքում հայտնվեց բանտում։ Նախօրեին արդեն «գցվածի» դերում Սլավոնական համալսարանի ռեկտոր Արմեն Դարբինյանն էր, ում ԱԱԾ-ով Փաշինյանն ուզում է հեռացնել պաշտոնից։ Իրականում, սակայն, կան նաև, այսպես կոչված, թաքուն «գցվածներ», որոնց պատմություններն այդքան հանրայնացված չեն, և որոնք դեռ լռում են։ Դրանցից մեկը վճռաբեկ դատարանի նախկին նախագահ, այսօր ՍԴ շարքային դատավոր Երվանդ Խունդկարյանն է։ Երբ այս մարդը դատավորների ընդհանուր ժողովում անսպասելիորեն ինքնառաջադրվեց որպես ՍԴ դատավորի թեկնածու, բոլորը զարմացան, թե վճռաբեկ դատարանի նախագահի երաշխավորված պաշտոնը (4 տարի կար վճռաբեկի նախագահի պաշտոնավարման ժամկետին) ինչո՞ւ է փոխում խնդրահարույց, հակասահմանադրական եղանակով բացված ՍԴ դատավորի պաշտոնի հետ։ Պարզվեց, որ Խունդկարյանին երաշխավորել են, որ ՍԴ նախագահ են դարձնելու, վերջինս էլ շրջապատից արդեն շնորհավորանքներ էր ընդունում դրա կապակցությամբ։

Այս ամենից բացի, ըստ շրջանառվող տեղեկություններրի, Խունդկարյանն անգամ ՍԴ դատավոր ընտրվելու կապակցությամբ փոքրիկ բանկետ է կազմակերպել վճռաբեկ դատարանում, հյուրերի թվում է եղել նաև վճռաբեկ դատարանի նախկին նախագահ Արման Մկրտումյանը՝ նրան աճեցրած անձը, որը շնորհավորել է Խունդկարյանին՝ դիմելով ՍԴ նախագահ տիտղոսով և ասել, որ մնացածը տեխնիկայի հարց է։ Ահա այս ամենից հետո տեղի ունեցավ այն, ինչ պիտի լիներ։ Խունդկարյանին չընտրեցին ՍԴ նախագահ, քանի որ Վահե Գրիգորյանը և նրա «պասով»՝ նաև Նիկոլ Փաշինյանը, ՍԴ նախագահի պաշտոնում իրենց «սրտի թեկնածուն» ունեին, որին դարձրին ՍԴ նախագահ։ Նիկոլից «գցվածների» շարքը կարելի է անվերջ շարունակել, որովհետև նա պայմանավորվածությունները հարգել չի սիրում և մարդկանց հետ վարվում է ըստ անհրաժեշտության, արդյունքում «զոհերի» թիվն աճում է, որոնք համալրում են հիասթափվածների ու փոշմանողների ստվար բանակը:

Անդրանիկ Կիրակոսյան

www.1or.am