Հաշմանդամություն ունեցող մարդիկ ավելի հաճախ են էլեկտրոնային ծխախոտ ծխում, քան հաշմանդամություն չունեցողները. հետազոտություն

Հաշմանդամություն ունեցող մեծահասակները երկու անգամ ավելի շատ են էլեկտրոնային ծխախոտ օգտագործում (8,4%), քան հաշմանդամություն չունեցող մեծահասակները (4,8%): Այս մասին են վկայում ԱՄՆ-ում սահմանափակ հնարավորություններով մեծահասակների կողմից էլեկտրոնային ծխախոտի օգտագործումը գնահատող առաջին ուսումնասիրության արդյունքները: Նոր տվյալները ներկայացվել են Disability and Health Journal ամսագրում:

Ջորջ Մեյսոնի համալսարանի առողջապահության եւ սոցիալական ծառայությունների քոլեջի մասնագետները պարզել են նաեւ, որ էլեկտրոնային ծխախոտի օգտագործման տարածվածությունը կախված է նաեւ հաշմանդամության տեսակից:

Դոկտոր Հիլբերտ Հիմը եւ նրա գործընկերները գնահատել են էլեկտրոնային ծխախոտի օգտագործումը հաշմանդամություն ունեցող եւ չունեցող 560 000 աշխատունակ տարիքի մեծահասակների (18-64 տարեկան) շրջանում՝ օգտագործելով 2017-2018 թվականների հետազոտության տվյալները: Նրանք նաեւ գնահատել են մեծահասակների շրջանում էլեկտրոնային ծխախոտի օգտագործման տարածվածությունը` ըստ հաշմանդամության տեսակի:

Ինչպես պարզվել է, էլեկտրոնային ծխախոտի օգտագործումը ավելի քան երկու անգամ ավելի տարածված է կոգնիտիվ խանգարումներով (12.0%), ինքնուրույն ապրելու հնարավորություն չունեցող (11,0%) կամ երկու եւ ավելի հաշմանդամություն ունեցող (9,2%) մեծահասակների մոտ՝ համեմատած հաշմանդամություն չունեցող մեծահասակների (4,8%) հետ։

Հաշմանդամություն ունեցող այն մեծահասակները, ովքեր նախկինում ծխել են, ավելի հաճախ են էլեկտրոնային ծխախոտ օգտագործել, քան հաշմանդամություն ունեցող այն մեծահասակները, ովքեր երբեք չեն ծխել: