Ինչո՞ւ պետք չէ երեխաներին թույլ տալ օգտվել սենսորային էկրանով սարքերից
ՀԱՍԱՐԱԿՈՒԹՅՈՒՆ
Երեխաները, որոնք ամեն օր օգտվում են սենսորային էկրանով սարքերից, արագ են ուշադրություն դարձնում էկրանին հայտնվող օբյեկտներին, սակայն, միեւնույն ժամանակ, դժվարությամբ են կենտրոնանում, եթե ինչ-որ բան նրանց շեղում է: Նման եզրակացության են եկել Բիրքբեկի համալսարանի, Լոնդոնի թագավորական քոլեջի եւ Բատի համալսարանի գիտնականները:
Eurek Alert-ի հաղորդմամբ՝ հետազոտողները հավաքել են խումբ 12 ամսական երեխաներից բաղկացած, որոնց մոտ սենսորային էկրանով սարքերից օգտվելու տարբեր ցուցանիշներ են եղել: Գիտնականները նրանց հետեւել են 2,5 տարվա ընթացքում: Այդ ընթացքում 3 անգամ երեխաների վիճակի անալիզ է անցկացվել՝ 12 ամսականում, 18 ամսականում եւ 3,5 տարեկանում:
Լաբորատորիա ամեն այցի ժամանակ երեխաները կատարել են ուշադրության թեստեր, որոնց ընթացքում օբյեկտները հայտնվել են համակարգչի էկրանի տարբեր հատվածներում, իսկ գիտնականները գրանցել են՝ որքան արագ է երեխան ուշադրություն դարձնում առարկայի վրա եւ որքան լավ է կարողանում անտեսել իրեն շեղող այլ առարկաները:
Պարզվել է, որ երեխաները, որոնք հաճախ են օգտվում սենսորային էկրանով սարքերից, դժվարացել են անտեսել նոր առարկաների հայտնվելը, եւ նրանց համար ավելի դժվար է եղել կենտրոնանալ, քան երեխաներին, որոնք քիչ են օգտվել սենսորային էկրանով սարքերից:
