Արցախում մահացած զինծառայողի ընտանիքը հայտնվել էր դրսում. վարկերի պատճառով կորցրել են տունը

Արցախում այս գիշեր դեռեւս չպարզված հանգամանքներում մահացած զինծառայող 21-ամյա Վարդան Առաքելյանի ընտանիքն ապրում է սոցիալապես ծանր պայմաններում:

«Տունը վարկի տակ էր, չէին կարողացել փակել, բանկն էլ ձեռքներից վերցրել էր: Հիմա ժամանակավոր դեռ այդ տանն են ապրում, բայց պիտի դուրս գան: Իրենք էլ չգիտեն` ինչ են անելու»,- NEWS.am-ին ասաց Արազափի գյուղապետ Մանվել Հարությունյանը, որի համագյուղացին էր մահացած զինծառայողը:

Առաքելյանները երեք որդի ունեին. ավագն ավարտել էր ծառայությունն ու վերադարձել, իսկ Վարդանը եղբոր հետ ծառայում էր Արցախում:

Ըստ Պաշտպանության բանակի տարածած հաղորդագրության` նոյեմբերի 13-ին` ժամը 02:15-ի սահմաններում, ՊԲ հարավային ուղղությամբ տեղակայված զորամասերից մեկի պահպանության տեղամասում, դեռեւս չպարզված հանգամանքներում, մահացու հրազենային վիրավորում է ստացել զինծառայող, 1995թ. ծնված Վարդան Հովհաննեսի Առաքելյանը:

Դեպքի մանրամասները պարզելու համար կատարվում է քննություն: