Փաշինյանի բոլոր գործողությունները՝ «Նիկոլ-Ալիև» ֆորմատում, բավարար են ապացուցելու՝ այս իշխանությունն այլևս չպետք է լինի. Արսեն Բաբայան (տեսանյութ)

Այս իշխանությունը փորձում է ցույց տալ, թե ՀՀ-ում պատերազմից հետո խնդիրներ չկան, և գոյություն չունեն այնպիսի կարևոր հարցեր, ինչպես քաղաքացիներին պաշտպանելը՝ նրանց տները կորցնելուց կամ գերիների վերադարձը, և հիմա հավաքվել են այստեղ, որոշել են, որ ԲԴԽ թեկնածու պետք է առաջադրվի: Այս մասին այսօր ԱԺ-ի դիմաց լրագրողների հետ զրույցում ասաց  իրավապաշտպան, «Հայրենիք» կուսակցության խորհրդի անդամ Արսեն Բաբայանը:

Նա նշեց, որ ի վերջո, այս պահին ցանկացած գործողություն, որն անում է իշխանությունը, միտված է ընդդիմությանը լռեցնելուն, որպեսզի, օրինակ՝ ևս մեկ անգամ նրանց ձերբակալելու դեպքում չլինի դատավոր, որը կհամարձակվի այդ գործողությունները ոչ իրավաչափ համարել:

««Հայրենիքի փրկության շարժումը» վիճակը քննարկում է և անհրաժեշտ քայլերն իրականացնում է: Նիկոլ Փաշինյանի բոլոր գործողությունները՝ «Նիկոլ-Ալիև» ֆորմատում, բավարար են ապացուցելու՝ այս իշխանությունն այլևս չպետք է լինի և հիմա փորձում են ֆեյքերով համոզել, թե հանրությունն իրենց աջակցում է, սակայն հանրությունը, վստահաբար, չի աջակցում և չի կարող աջակցել»,-ասաց նա:

Բաբայանը նշեց՝ ի վերջո ժամանակն է, որ պատգամավորները, իր գնահատմամբ, «ուսապարկից»  վերածվեն մարդու և հայրենիքի մասին մտածողի: «Մենք կրկին հնարավորություն ենք տալիս այս մարդկանց՝ հասկանալու, որ քանի դեռ մենք սահմանադրական ճանապարհով  բացատրում ենք, պայքարում ենք, ժամանակն է, որ նրանք էլ գնան կոնկրետ քայլերի»:

Հիշեցնենք, որ քաղաքացիները բողոքի ակցիա էին անում ԱԺ-ի դիմաց՝ ԲԴԽ անդամների ընտրության դեմ։ Նշենք, որ խորհրդարանն այսօր ընտրում է ԲԴԽ անդամների։ Քաղաքացիները նշում են, որ մեր երկրում կան ավելի առաջնային խնդիրներ, ինչպիսիք են գերիների վերադարձն ու զոհվածների մարմինները գտնելը։ Սակայն իշխանությունը շտապում է ընտրել իրեն հաճո ԲԴԽ անդամներ՝ անկախ դատավորին վերջնականապես ճնշելու համար։