Մագնիսային նանոմասնիկները կարող են արդյունավետ լինել ագրեսիվ քաղցկեղի դեմ

Նոր մոտեցումը, որը համադրում է մագնիսային մասնիկներով ստանդարտ թերապիա եւ բառացիորեն այրում է քաղցկեղային բջիջները, կարող է 34 տոկոսով մեծացնել ագրեսիվ քաղցկեղի բուժման ժամանակ քիմիաթերապիայի արդյունավետությունը: Այս մասին հայտնում են Լոնդոնի համալսարանական քոլեջի գիտնականները:  

Ինչպես հայտնում է The Daily Mail-ը, հետազոտողները հայտնաբերել են, որ ջերմային ազդեցության եւ քիմիաթերապեւտիկ միջոցների համադրությունը զգալիորեն ուժեղացնում է հակաքաղցկեղային թերապիայի արդյունքը:

Նոր մոտեցման գաղափարը հետեւյալն է. մանգիսային նանոմասնիկները միանում են քաղցկեղային բջիջներին՝ միաժամանակ իրենց հետ տանելով հակաքաղցկեղային ագենտ: Դրանից հետո մարդու համար անվտանգ մագնիսական դաշտ է կիրառվում խոցված հատվածի նկատմամբ: Դա ակտիվացնում է նանոմասնիկների մագնիսային հատկությունները, ինչը մասնիկներին ստիպում է այրվել եւ այրել, համապատասխանաբար, քաղցկեղային բջիջները: Տվյալ գործընթացը վնաս է հասցնում ուռուցքին՝ այն քիչ կայուն դարձնելով քիմիաթերապեւտիկ ագենտի նկատմամբ:

Այս մեթոդը դեռեւս ստուգել են միայն լաբորատոր պայմաններում մարդու կրծքագեղձի քաղցկեղի եւ գլիոբլաստոմայի (գլխուղեղի քաղցկեղ) բջիջներում: Նանոմասնիկների հետ օգտագործվել է դոքսորուբիցին քիմիաթերապեւտիկ դեղամիջոց: Այդ համադրությունը 48 ժամում սպանել է քաղցկեղի բջիջների 98 տոկոսը: Միայն դոքսորուբիցինը սպանել է բջիջների 73 տոկոսը: Ինչ վերաբերում է կրծքագեղձի քաղցկեղին, ապա ցուցանիշները կազմել են 89 տոկոս եւ 77 տոկոս, համապատասխանաբար: