Իմ տղան նամակ է ուղարկել, որ այսինչ տեղում շրջափակման մեջ Է գտնվում, գեներալ Մակարյանին ու հրամանատարին կոնկրետ տեղը նշել եմ, բացարձակ ոչինչ չարեցին. անհետ կորած զինծառայողի ծնող
ՀԱՍԱՐԱԿՈՒԹՅՈՒՆ
Տղաները, երբ շրջափակման մեջ են եղել, տեղեկացրել են, որ շրջափակման մեջ ենՙ իմ տղան նամակ է ուղարկել, որ շրջափակման մեջ է գտնվում՝ այսինչ տեղում, ես այդ իրիկուն՝ գնացել եմ Կապան, մտել եմ Կապանի շտաբ գեներալ Անդրանիկ Մակարյանին ասել եմ, որ իմ տղան այսինչ տեղում է, կոնկրետ տեղը նշել եմ, նույնը ասել եմ հրամանատար Արսեն Աբգարյանին, ասել եմ եկեք մի հնար գտնենք հանենք, սակայն բացարձակ ոչինչ չարեցին, Էջմիածնի զորամասի դիմաց նստացույցի ժամանակ ասաց անհետ կորած զինծառայողի ծնողը:
«Ինձ ասացին՝ հոպար ջան, մարդ կա մի ամիս շրջափակման մեջ է լինում, հետո դուրս է գալիս մի քանի օր հետո կգա, մինչև այսօր չկա»,– ասաց նա՝ նշելով, որ հայ գերիների մասին համացանցում հայտնված մի տեսանյութում գերիներից մեկին նմանեցրել են իր տղային, սակայն ինքը վստահ չէ, որ տեսանյութի տղան իր տղան է:
«Ստի վրա հիմնված երկիր է, թող ղեկավարներից մեկը գա ասի այս բանը ճիշտ եմ ասել, ինչքան հանդիպում եղել է, ասել եմ՝ գոնե մի բան ասեք, որ արել եք: Զորամասի հրամանատարն ասում է, որ ես հրաման եմ տվել փախչել, ասում եմ՝ դու ռազմական զորամասի աշխատող ես, ո՞ւր փախնեն, եթե տեղանքին ծանոթ չեն: Եթե պետք է նահանջենք, դու պետք է զորքի հետ նահանջես, բայց դու փախել, եկել ես, քո զորքը ո՞ւր է: Եթե զորքին նահանջ են տալիս, առանց հրամանատարի, որտե՞ղ են դիրքավորելու»,- նշեց նա:
