«Նոր տարին առանց Նիկոլի»․ Իշխան Սաղաթելյանը կոչ արեց վաղը կրկին հավաքվել

«Վաղը շարունակում ենք մեր երթը, այն կմեկնարկի ժամը 17։00-ին՝ Կրկեսի մոտից, որի ժամանակ կանգ ենք առնելու Դատախազության, Ոստիկանության և Ազգային անվտանգության ծառայության շենքերի դիմաց»,- այսօր «Հայրենիքի փրկության շարժման» նախաձեռնած «Արժանապատվության երթի» ժամանակ հայտարարեց ՀՅԴ ԳՄ ներկայացուցիչ Իշխան Սաղաթելյանը՝ հավելելով․ «Դատախազության առջև մենք կոչ ենք անելու, որպեսզի հարուցված քրեական գործի շրջանակներում դավաճանության հոդվածով մեղադրանք առաջադրվի Նիկոլ Փաշինյանին և նրան ձերբակալել: Մենք երթ ունենք նաև հինգշաբթի, իսկ շաբաթ օրը հանրահավաք և սգո երթ ունենք»։

Սաղաթելյանը նշեց, որ ամեն օր լինելու են զանգվածային նոր գործողություններ։ «Մենք կվերադարձնենք մեր արժանապատվությունը և միասին կկառուցենք մեր երազանքի երկիրը»,- ասաց նա՝ վստահեցնելով, որ առաջիկա 10 օրերին հասնելու են իրենց նպատակին։ «Նոր տարին առանց Նիկոլի»,- խոստացավ քաղաքական գործիչը։