Դեկտեմբեր-հունվար ամիսներին վերահսկողությունը կխստացվի
ՀԱՍԱՐԱԿՈՒԹՅՈՒՆ
ՍԱՏՄ ղեկավար Գեորգի Ավետիսյանը վստահեցնում է, որ Հայաստանում բոլոր խոշոր և մանր եղջերավոր կենդանիները պատվաստված են, իսկ մայրաքաղաքի մեծ և փոքր խանութներում վաճառվող միսը՝ սպանդանոցային ծագման է: Ուստի, Երևանում վաճառվող միսն անվտանգ է:
1or.am-ի հետ զրույցում, սակայն, Գ.Ավետիսյանը նշեց, որ սրան զուգահեռ որոշ մարզերում դեռևս շարունակվում է բակային մորթ և վաճառք իրականացնելու երևույթները, ինչը դուրս է կառույցի վերահսկողության տիրույթից:
«Կառույցը բակային մորթի և վաճառքի հարցում վերահսկողություն իրականացնելու իրավասություն չունի, ուստի չստուգված մսամթերքից խուսափելու համար կոչ ենք անում զերծ մնալ մեքենայի թափքից կամ այլ եղանակով վաճառվող միս ձեռք բերելուց»,- ասաց Գ. Ավետիսյանը:
Կառույցի ղեկավարի խոսքով՝ աշխատանքներ են տարվում տեղական ինքնակառավարման մարմինների հետ այս հարցը լուծելու ուղիներ գտնելու համար, բայց այս պահին հարկավոր է զերծ մնալ նաև դրսում վաճառվող ձուկ, ձու, կաթ, մածուն գնելուց: Ինչ վերաբերում է տոներին ընդառաջ իրականացվող վերահսկողական գործողություննեին, ապա դեկտեմբեր-հունվար ամիսներին կխստացվի մսեղենի հանդեպ վերահսկողությունը, որպեսզի տոնական օրերին բակերում անհայտ ծագման մսամթերք, ձկնեղեն կամ կաթնամթերք չվաճառվի:
Կարինե Կարոյան
