Նիկոլ Փաշինյանի վերջին գրառումներն ինքնաարդարացման ճղճիմ, ողորմելի փորձեր են. Շաքե Իսայան

Նիկոլ Փաշինյանի վերջին գրառումները ինքնաարդարացման հերթական ճղճիմ փորձեր են, որոնց հասարակությունը բավականին ադեկվատ է արձագանքում, այլևս որևէ մեկը ստերի շարքը ի գիտություն չի ընդունելու: Այս մասին Tert.am-ի հետ զրույցում ասաց ԱԺ «Բարգավաճ Հայաստան» խմբակցության պատգամավոր Շաքե Իսայանը՝ անդրադառնալով Նիկոլ Փաշինյանի գրառմանը, թե դեռ 2011 թվականին Կազանում Հայաստանը պատրաստ է եղել հանձնել 7 շրջանները՝ Ղարաբաղի միջանկյալ կարգավիճակի եւ կարգավիճակի հարցով հետագա հանրաքվեի դիմաց, բայց Ադրբեջանը չի համաձայնել և նորանոր պահանջներ է առաջ քաշել:

«Ես շատ լավ եմ հիշում, որ Նիկոլ Փաշինյանը ԱԺ-ում հայտարարեց, որ բանակցությունները սկսում է սեփական կետից, թե որն էր սեփական կետը և, ցավոք, ինչի հանգեցինք այսօր, արդեն ականատեսն ենք եղել: Այսօր հետադարձ հայացք նետել 2011 թվականի փաստաթղթին, փորձել նորից ու նորից մեղավորներ գտնել, ինձ համար ողորմելի արարք է: Դուք շատ լավ հիշում եք, որ երբ իմ գործընկեր Արման Աբովյանին պատասխանեց, ասաց՝ ինչ պետք է, այդ էլ բանակցում ենք: Այս ողջ ընթացքում իշխանությունները տեղեկատվական տոտալ բլոկադայի մեջ են պահել բոլորին, քաղաքական ուժերին»,-ասաց նա:

Շաքե Իսայանն ասաց, որ այս ողջ ընթացքում Նիկոլ Փաշինյանը մեղավորներ է ներկայացնում․ Փաշինյանի համար մեղավոր է «դասալիք» զինվորը, ծնողը, կամավորը, ազատամարտիկը, գեներալը, ընդդիմադիր խմբակցությունները, ներքին և արտաքին քաղաքական ուժերը, մինչդեռ առաջին պատասխանատուն հենց Նիկոլ Փաշինյանն է:

Շաքե Իսայանի խոսքով՝ քաղաքական ուժերը շարունակելու են իրենց պայքարը, առաջիկայում ևս հանրահավաք են իրականացնելու, եթե Ծառուկյանին իրավապահները չհրավիրեն, նա ևս կմասնակցի:

Ըստ նրա՝ այս պահին կարևորը ռազմագերների, անհետ կորածների, և զոհված զինծառայողների մարմիների վերադարձի հարցն է, ինչի փոխարեն տեսնում ենք, թե Նիկոլ Փաշինյանն ինչ է անում:

Մանրամասները՝ տեսանյութում։