Տեսախցիկի առջև զինծառայողների մասին պատմելը՝ վտանգում է երկրի անվտանգությանը
ՀԱՍԱՐԱԿՈՒԹՅՈՒՆ
Հայկական մարտական դիրքերի, դիրքերում գտնվող զինվորների մասին տեղեկություններ հրապարակելը դարձել է համացանցի քննարկման թեմա: Նույնիսկ, հրապարակավ այնպիսի տեղեկություններ են տարածվում, որոնք պետական գաղտնիք են պարունակում: Սա միտումնավոր է արվում, թե՝ անտեղյակությունից դրդված, դժվար է ասել, բայց որ դրանով հակառակորդի ջրաղացին ջուր լցնելը չի բխում որևէ մեկի շահերից՝ միանշանակ է:
Հուզականության բարձր աստիճանում գտնվելով զինծռայողների ծնողները խոսում են այնպիսի բաների ու երևույթների մասին, որը հոգեպես կարող է խորը վիրավորել զոհվածների ծնողներին ու հարազատներին: Բոլորին է հայտնի, որ բանակը փակ կառույց է և ծառայողներն իրավունք չունեն ծառայության մեջ գտնվող իրենց որդիների կողմից ծառայության ընթացքում իրականացվող գործողությունների կամ իրավիճակի մասին հեռախոսով պատմածը պատմել բոլորին:
Այդպես եղել է միշտ, անգամ երբ հարաբերական հրադադար էր սահմանին: Մշտապես ժամկետային զինծառայողների ծնողները իմացել են, թե իրականում ինչի կարիք ունեն իրենց որդիները, բայց լուռ, առանց այդ մասին հրապարակավ հայտարարելու հոգացել են իրենց զինվորների անհրաժեշտ կարիքները: Հիմա ամեն ինչ դուրս է եկել վերահսկողությունից և նույնիսկ ծնողները անտեսելով պատերազմական իրավիճակի հետևանքով առաջացած փխրուն հրադադարի վտանգները, իրենց երեխաների պատմածը առանց կաշկանդվելու պատմում են տեսախցիկների առջև, առանց մտածելու, թե ինչ վնաս են հասցնում հենց իրենց զինվոր որդիներին: Մի կողմ թողնելով իշխանությունների հանդեպ վերաբերմունքը, հարկավոր է ընդամենը հիշել, որ երկիրը գտնվում է պատերազմական իրավիճակում և այս պայմաններում ավելորդ գործողությունները վնաս է հասցնում ողջ երկրի անվտանգությանը:
Արմինե Գրիգորյան
