Դիմակ կրելուց բացի անհրաժեշտ է նաև պահպանել մյուս պայմանները
ՀԱՍԱՐԱԿՈՒԹՅՈՒՆ
1or.am կայքի զրուցակիցը վիրուսաբան Հովակիմ Զաքարյանն է։
- Պարոն Զաքարյան, կորոնավիրուսը կրկին գլուխ է բարձրացրել և վերջին երկու օրերին կարծես թե վարակվածների թվերը ավելացել են։ Ինչի՞ մասին է սա վկայում, արդյո՞ք համավարակի երկրորդ ալիք է բարձրացել։
— Առհասարակ այդ ալիքներ կոչվածը շատ պայմանական հասկացողություն է։ Այնպես չէ, որ մեզ մոտ վերացել էր վիրուսը, և այլևս դեպքեր չկային և հիմա գլուխ է բարձրացրել, մենք անընդհատ նոր դեպքեր ունեինք, սակայն թվերը նվազել էր։ Հիմա տեսնում ենք, որ կրկին կտրուկ աճ է գրանցվել և այսօր կարծեմ այս ընթացքի ամենամեծ թիվն է գրանցվել 1000-ից ավել վարակված։ Իսկ այս ամենը խոսում է այն մասին, որ մարդիկ նորից սկսել են չպահպանել կանոնները։ Իսկ, երբ որ սկսում ենք չհետևել կանոններին, բայց վիրուսը շարունակում է մնալ երկրում, բնականաբար, սկսում է կրկին տարածվել։
- Ի՞նչ եք կարծում մինչև հիմա դիմակ կրելն է հանդիսանում վիրուսից պաշտպանվելու գլխավոր միջոցը։
— Գլխավոր միջոցը չի այլ գլխավոր միջոցներից մեկն է։ Կան մի քանի միջոցներ, որոնք անհրաժեշտ են միասին իրականացնել։ Պետք է պահել սոցիալական հեռավորություն, պետք է մաքրել տարածքները, պետք է հետևել տարածքների օդափոխմանը և այլն։ Իսկ դիմակ կրելը պաշտպանվելու միջոցներից մեկն է և եթե դուք կրում եք դիմակ բայց չեք հետևում մնացած միջոցներին, ապա դիմակ կրելու արդյունավետությունն էլ է էապես նվազում։ Եթե բոլոր պայմանները միաժամանակ պահպանվեն, ապա կտեսնենք, որ այդ ամբողջ պայքարը կլինի արդյունավետ։ Շատ դեպքերում մարդիկ դիմակներն էլ են սխալ կրում, ինչը պայքարը արդյունավետ չի դարձնում։
Սոնա Գիշյան
