Ուռուցքաբանը նշել է՝ որոնք են քաղցկեղի զարգացման հավանականությունը բարձրացնող գործոնները

ՌԴ առողջապահության նախարարության գլխավոր ուռուցքաբան Անդրեյ Կապրինը նշել է, թե որ գործոններն են զգալիորեն բարձրացնում քաղցկեղի զարգացման հավանականությունը, գրում է «РИА Новости»-ն։ 

Մասնագետի խոսքով՝ օնկոլոգիական հիվանդությունների դեպքերի միայն շուրջ 15%-ն է պայմանավորված գենետիկական նախատրամադրվածությամբ, մինչդեռ տարիքով ու կենսակերպով պայմանավորված մուտացիաները շատ ավելի մեծ նշանակություն են ունենում։ 

Ինչպես նշում է Կապրինը, միայն ծխախոտի գործածությունն արդեն իսկ բարձրացնում է քաղցկեղի զարգացման հավանականությունը 30 անգամ։ Բացի այդ, այս հիվանդության զարգացման հավանականության վրա ազդում է նաև ալկոհոլի գործածությունը։ 

Բժշկի խոսքով՝ շատ հաճախ առողջ գենետիկա ունեցող ընտանիքի անդամների մոտ ախտորոշվում է քաղցկեղ, իսկ ավելի ուշ պարզվում է, որ այն պայմանավորված է վատ սովորություններով։ Ընդ որում՝ մասնագետն ընդգծում է, որ ծխախոտից հրաժարվելուց հետո օրգանիզմն «ուշքի է գալիս» միայն տասը տարի անց։

Բացի այդ, ոչ պակաս կարևոր դեր է խաղում նաև տարիքը։ Կապրինի խոսքով՝ 65 տարեկանից հետո յուրաքանչյուր հինգ տարվա ընթացքում օրգանիզմում բջջային մուտացիաների քանակությունը բարձրանում է 10%-ով, իսկ այդ մուտացիաները կարող են դառնալ քացկեղի զարգացման պատճառ։