ԱԺ պատգամավոր Համազասպ Դանիելյանը փակագծեր բացեց
ՔԱՂԱՔԱԿԱՆՈՒԹՅՈՒՆ
Այն, որ ՍԴ դատավորների թեկնածուների ընտրության հարցում ԱԺ «Իմ քայլը» խմբակցության պատգամավորների կարծիքները միանշանակ չեն եղել, այլևս գաղտնիք չէ:
Բայց, որ հարցի քննարկումը դարձել է բուռն բանավեճի պատճառ, նոր է բարձրաձայնվում: Մամուլում տեղեկություններ էին շրջանառվում, թե իշխող խմբակցության պատգամավոր Համազասպ Դանիելյանը, նույնիսկ հայտարարել է, որ եթե թեկնածուներն ընտրվեն, ապա վայր կդնի իր մանդատը:
1or.am-ի հետ զրույցում խմբակցության պատգամավոր Համազասպ Դանիելյանը նշեց, որ խմբակցությունում քննարկվող բոլոր հարցերը մշտապես բանավեճերի ուղեկցությամբ են ընթանում, ինչը նորություն չէ: Ուստի, բացառություն չէր կարող լինել նաև ՍԴ դատավորների թեկնածուների շուրջ ծավալված քննարկման բուռն ընթացքը:
«Այս ամենը հարիր է ժողովրդավարական արժեքներ կրող պառլամենտին, առավել ևս, երբ խոսքը իշխող կուսակցությունը ներկայացնող խմբակցության մասին է:
Ինչ վերաբերում է իմ անձի շուրջ տարածված՝ մանդատը վայր դնելու մասին խոսակցություններին, ապա դա չի համապատասխանում իրականությանը: Ես գիտեմ, թե որ դեպքում նման քայլի կգնամ, բայց մինչ օրս նման առիթ չի եղել:
Ինչ վերաբերվում է ՍԴ թեկնածուներին, ապա խմբակցության համար առաջնայինը ՍԴ կազմի համալրման հարցն էր, քանի որ այն անորոշ ժամանակով հետաձգել հնարավոր չէր»,- ասաց պատգամավորը:
Անի Սուքիասյան
