21 մլրդ դրամ ուղղված է ճանապարհաշինությանը, նախատեսվում է հիմնանորոգել 250 կմ ճանապարհ․ քննարկում վարչապետի մոտ
ՔԱՂԱՔԱԿԱՆՈՒԹՅՈՒՆԿառավարությունում քննարկվել է ենթակառուցվածքների և բնակարանաշինության ոլորտներում կապիտալ ծրագրերի իրականացման ընթացքը։
«Այս տարի կապիտալ ծախսերի թերակատարված ամեն տոկոս նշանակում է չստեղծված աշխատատեղեր, նշանակում է աշխատավարձ չստացած ընտանիքներ, նշանակում է տնտեսվարողներ, որոնք պետք է օգտվեին, շահույթ ստանային, գործունեություն ծավալեին պետական ծախսերի համատեքստում, ինչն իր հերթին բերում է մեր երկրում ծանրացող սոցիալական իրադրության ավելի բարդացում: Այս առումով, մենք իսկապես պետք է առանձնահատուկ որակով և ծավալով կապիտալ ծախսեր իրականացնենք»,֊ նշել է վարչապետ Նիկոլ Փաշինյանը։
Տարածքային կառավարման և ենթակառուցվածքների նախարար Սուրեն Պապիկյանը զեկուցել է, որ նախարարության
կապիտալ ծախսերի համար 2020 թվականին պետական բյուջեով հատկացվել է 22 մլրդ 380 մլն դրամ, որից 21 մլրդ դրամն ուղղված է ճանապարհաշինությանը: Այդ միջոցների շրջանակում նախատեսվում է հիմնանորոգել 250 կմ ճանապարհ: Այլ ծրագրերի շրջանակում մասնակի կնորոգվի ևս 80 կմ և կվերանորոգվի 65 կմ կենսական ճանապարհներ, 90 կմ էլ կհիմնանորոգվի վարկային ծրագրերի շրջանակում:
Շինարարության նախապատրաստական աշխատանքներն ընթացքի մեջ են և մայիսի 5-ից բուն շինարարությունը
կմեկնարկի:
