Նիկոլ Փաշինյանը տիկնոջ՝ Աննա Հակոբյանի հետ հարգանքի տուրք մատուցեց Ցեղասպանության զոհերի հիշատակին (ֆոտո)

Այսօր` ապրիլի 24-ին, Հայոց ցեղասպանության սուրբ նահատակների ոգեկոչման օրը, վարչապետ Նիկոլ Փաշինյանը Ծիծեռնակաբերդի բարձունքում հարգանքի տուրք մատուցեց Ցեղասպանության զոհերի հիշատակին։

Կորոնավիրուսի տարածման պայմաններում արտակարգ իրավիճակով պայմանավորված՝ վարչապետը հուշահամալիր է այցելել ոչ թե իշխանական վերնախավի ուղեկցությամբ, այլ միայն կնոջ՝ Աննա Հակոբյանի հետ։

Ավելի ուշ առանձին խմբերով հուշահամալիր կայցելեն նաև մյուս պաշտոնյաները։

Փաշինյանը նաև Ծիծեռնակաբերդից հանդես եկավ համայն հայության ուղղված ուղերձով։

Նոր կորոնավիրուսի համավարակով պայմանավորված դեպի հուշահամալիր տանող բոլոր ճանապարհները փակ են մինչեւ ապրիլի 25-ը՝ ժամը 22-ը։

Ապրիլի 24-ին՝ ժամը 08:00-ից սկսած, քաղաքացիները կարող են հաղորդագրություն ուղարկել 1915 կարճ համարին Հայաստանից, և 0037433191500՝ արտասահմանից։ Հաղորդագրություն ուղարկած քաղաքացիների անունները կարտացոլվեն հուշահամալիրի սյուներին` այդպիսով ազդարարելով իրենց խորհրդանշական մասնակցությունը և հարգանքի տուրքը Սուրբ նահատակների հիշատակին։