«ԹՈւՄՈ»-ի շենքում կորոնավիրուսով վարակված քաղաքացի է եղել. դասընթացները դադարեցվում են մինչև ապրիլի 12-ը
ՀԱՍԱՐԱԿՈՒԹՅՈՒՆ«Թումո» ստեղծարար տեխնոլոգիաների կենտրոնի տնօրինությունը նոր տիպի կորոնավիրուսի տարածման պատճառով որոշում է կայացրել բոլոր 4 մասնաճյուղում դադարեցնել դասընթացները մինչև ապրիլի 12-ը:
«Արմենպրես»-ի հետ զրույցում այս մասին ասաց «Թումո»-ի հաղորդակցման, միջոցառումների և հանրության հետ կապերի բաժնի ղեկավար Զարուհի Բուդաղյանը:
«Հաշվի առնելով «Թումո»-ի մասնաճյուղերում երեխաների մեծ թիվն ու ակտիվությունը, մեր տնօրինությունը նմանատիպ որոշում է կայացրել: Մենք ցանկանում ենք պաշտպանել մեր ուսանողներին կորոնավիրուսի հետ կապված հնարավոր ռիսկերից»,- նշեց Բուդաղյանը:
Նա անդրադարձավ նաև տարածված այն լուրերին, որ իրենց շենքում է գտնվել կորոնավիրուսով վարակված 3 անձանցից մեկը, ով Իտալիայի քաղաքացի է:
«Լուրերը ճիշտ են, նա իրոք եղել է «Թումո»-ի երևանյան մասնաճյուղում՝ 6-րդ հարկում: Նա եղել է «Սինոփսիս»-ի գրասենյակի կառուցման աշխատանքների հատվածում: Ամենայն պատասխանատվությամբ հայտարարում ենք, որ մենք նայել ենք մեր շենքի բոլոր տեսաձայնագրող սարքերով, որ նա եղել է միայն 6-րդ հարկում, որտեղ չի եղել ոչ անձնակազմից, ոչ էլ աշակերտներից որևէ մեկը: Նա չի շփվել շենքում գտնվող ոչ մի անձի հետ»,- շեշտեց Բուդաղյանը:
«Թումո»-ի մասնաճյուղեր կան Երևանում (15 հազար ուսանող), Գյումրիում (2200 ուսանող), Դիլիջանում (350 ուսանող) և Ստեփանակերտում (1000 ուսանող):
