«Արթիկ» ՔԿՀ-ի բանտարկյալներին կարելի է առցանց եղանակով ծանրոցներ ու հանձնուքներ փոխանցել

Առցանց պատվերի ծառայությունն արդեն հասանելի է ՀՀ ԱՆ «Արթիկ» քրեակատարողական հիմնարկում պահվող կալանավորված անձանց եւ դատապարտյալների համար:

ՀՀ Արդարադատության նախարարության Քրեակատարողական վարչության հանրային կապերի բաժնից NEWS.am-ին հայտնում են, որ քրեակատարողական ծառայությունում ընթացող համակարգային բարեփոխումների շրջանակներում ՀՀ կառավարության որոշմամբ սահմանված կարգով 2016 թվականի մարտի 11-ից ՀՀ ԱՆ «Արմավիր» քրեակատարողական հիմնարկում արդեն իսկ մեկնարկել է կալանավորված անձանց եւ դատապարտյալներին առցանց եղանակով ծանրոցներ, հանձնուքներ եւ փաթեթներ փոխանցելու գործընթացը:

Շահագրգիռ անձինք կարող են առանց քրեակատարողական հիմնարկներ այցելելու՝ հանձնուքների փոխանցման գործողությունն իրականացնել նաեւ առցանց եղանակով՝ օգտվելով քրեակատարողական ծառայության պաշտոնական www.ced.am կայքէջից: