Շատ վիրավորական էր, որ Նիկոլ Փաշինյանը չանդրադարձավ զոհված զինծառայողների ընտանիքներին․ սեւազգեստ մայր
ՎԻԴԵՈՇատ վիրավորական էր, որ վարչապետ Նիկոլ Փաշինյանը չանդրադարձավ զոհված զինծառայողների ընտանիքներին, տեսնում եք՝ պարգեւավճարները ում են տալիս, իսկ տղաները, որոնք իրենք կյանքը տվել են հայրենիքի համար, անտեսվում են։ Այս մասին այսօր՝ դեկտեմբերի 24-ին, «Եռաբլուր» պանթեոնում ասաց «Մեզ բացակա չդնեք» ՀԿ նախագահ Սաթիկ Խլղաթյանը։
«Հունվար ամսից մենք բազմիցս դիմել ենք կառավարությանը՝ ակնկալելով կառավարության աջակցությունը զոհված ազատամարտիկների ընտանիքներին։ Նամակի տեսքով, ընդդիմանալու տեսքով մենք պահանջ ենք ներկայացրել, սակայն մնացել ենք անպատասխան։ Մեզանից որեւէ մեկը չէր սպասի, որ կառավարությունը չէր անդրադառնա այս ընտանիքներին։ Կառավարությունը ժամանակ շահեց, հանդիպման ժամանակ վարչապետը հանձնարարեց իր օգնականին սեղմ ժամկետում հարցին լուծում տալ, բայց այդ ժամանակը երկարեց մինչեւ 2 ամիս, ու մենք մնացել ենք անպատասխան»,-նշեց նա։
Նա վիրավորական համարեց զոհված զինծառայողների ընտանիքների նկատմամաբ կառավարության վերաբերմունքը․ «Մենք հույս ունեինք, որ վարչապետը կանդրադառնա նաեւ մեր ընտանիքներին, վերջիվերջո կհասկանար, որ պետության լիիրավ տերերն այս մարդիկ են, ոչ թե իրենք են, այս տղաների արյան շնորհիվ է ձեռք բերվել անկախությունն ու խաղաղությունը, շատ տգեղ է եւ շատ վիրավորական, որ վարչապետը չանդարդարձավ այս ընտանքիներին, տեսնում եք պարգեւավճարները ում են տալիս, իսկ տղաները, ովքեր իրենք կյաբնքը տվել են հայրենիքի համար, անտեսվում են»։
